A Daniel Manin
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← L'Estrazion de 'Loto | Edission e fonte ▼ | La frutarola e 'l forestier → |
Quando la bona Pasqua
Ga dà Verona a sior Napoleon,
Lu, el gà pensà, o Venezia,
De tagiarghe le ale al to Leon.
Ma quando che quel ultimo
Dose, pianzendo, (e no me maravegio)
El gà dito: Arendèmose!
E impaurio taseva el Gran Consegio;
Soltanto el vecio Pesaro
El se gà alzà zigando: Resistemo!
Ma çinquecento piegore
Che gà risposto: Varte, se arendemo!...
Se un Morosini, o un Dandolo
Ghe fusse sta, o un Pisani, o un Moçenigo,
Invece che quei tangari
Inçipriai che no i valeva un figo;
Perdio, che no saressimo
Stai a Campoformio, come bestie in fiera
Vendui per poche svànzeghe
A l'Austria da quel remo de galera!..
Ma za, xe propio inutile,
Contro el destin combater no se pol;
E quando se xe tisichi
Crepar bisogna, anca se no se vol.
Giusto; ma 'na Republica
Che gà fato tremar tuta la Tera,
No la doveva arenderse
Da vigliaca cussì, senza 'na guera!...
Ma se dopo quatordese
Seco'i de gloria, come un pero marzo
La xe cascada, eroica
La xe tornada al ventidò de Marzo.
Daniel, un fio del Popolo,
Scielto el nome del Dose vergognoso,
Manin, per tuti i secoli
El lo gà fato grando e glorioso.
Da le Preson el Popolo
Co Tomaseo in trionfo el lo portava
In Piazza, dove liberi
De Sa' Marco i stendardi sventolava.
E in quel famoso Assedio
Del Quarantaoto, col Popolo insorto,
El gà mostrà a quei barbari
Che 'l valor venezian no 'l gera morto!
Che in te le vene, el sangue
De Bajamonte ancora ghe bogiva;
E solo, contro l'Austria
Fin a l'ultimo sempre el resistiva.
Da Mestre, la mitragia
La pioveva che Dio... no la mandava;
Ma i nostri respondendoghe
Per le rime, i canoni i ghe inciodava.
Zoveni, veci e femene
I moriva tasendo là, al so posto;
Ma guai parlar de arenderse!
Se doveva resister a ogni costo...
Le bombe fava stragie
No manco de la fame, e più el colèra;
E quando 'na brutissima
Notizia vien che xe cascà Malghera,
El Ponte salta in aria...
Ma cossa se pol far co tuto manca?
Manin, parte in esilio,
E Venezia alza la bandiera bianca!
Tuti coreva a vèdarlo
I veneziani, el gran conçitadin,
E i pianzeva disèndoghe:
Daniel, arivederçi! Adio, Manin!
E lu, drito sul càssaro
De quel Vapor che lo menava via...
Vardandola per l'ultima
Volta el diseva: Adio, Venezia mia!
Cussì, vissudo povaro
Insegnando a Parigi l'italian...
Moriva quel gran esule
De crepacuor... là, solo, come un can!
Morto, Venezia libera,
La lo gà riçevuo co gran onor;
Ma più che su le lapide
I Veneziani lo gà drento el cuor!
Gloria a Manin nei secoli
Fin che l'amor de patria restarà,
Infin che l'odio ai barbari
Nei nostri cuori forte parlarà!
Venezia, 22 Marzo 1903.