A Toni Fradeletto
|
Edission original: |
Attilio Sarfatti, Le Rime Veneziane e Il Minuetto, Milano, Fratelli Treves Editori, 1892 |
|
Fonte: |
| ← XXXIX. Al Muniçipio | Edission e fonte ▼ | XLI. El diavolo de paradiso → |
Co saremo do veci carghi d'ani,
Toni, che serietà che gaveremo.
De gnoca gravità se imbotiremo
Co saremo do veci ombrosi e strani.
Zigaremo ogni dì de logo in logo
Contro la zoventù piena de fogo.
E vantaremo el bel tempo passà,
Seri e imbotii de gnoca gravità.
Saremo tuti do do brontoloni,
Do Tódari de quei de far pietà.
E che tirae, che razza de sermoni,
Dale boche sdentae ne piovarà.
Diremo: mata xe la zoventù...
No gh'è più religion, no gh'è virtù.
Diremo: el vizio fa per tuto scuola,
Tossindo e tabacando a ogni parola.
Cussì fa i veci, e, gnanca dirla, Toni,
Faremo tuti do çerto cussì.
Ma co saremo malandai e noni,
Lontani tanto da sti cari dì,
No pensaremo ai zorni benedeti,
Che zoveni anca nu pieni de afeti,
Pieni de fogo, de alegria e speranza,
Se rideva dei veci a crepapanza.