A l'ora dei Brindisi
A l'ora dei Brindisi
Do versi ghe vol.
Me sento za in gringola,
Me tegna chi pol;
5Son tuto in furor
Per causa de Amor.
Amor che xe l'anema
De tuto el creà,
Amor che i filosofi
10À sempre burlà,
De Baco amigon
E gran compagnon;
Intorno sta camera
Vardè come el zira!
15Vardèlo sto picolo
Che ancora el ghe tira
Do dardi amorosi
In cuor de sti Sposi!
Ma i xe de quei lucidi
20Ch'el scieglie costù
Co in nodo strettissimo
El liga virtù;
I val un tesoro,
I xe tuti d'oro.
25Le smorfie, le smanie
Da questi no vien,
No i sparge per l'anema
Col gusto el velen,
No i tol l'apetito
30Co i move el prurito.
Un senso piacevole
In peto i ve desta
Che senza pericolo
Ve impizza la testa.
35El cuor no se stanca,
La fiama no manca,
E in tanto dal tepido
Vien fora i bambini...
Vardè che bei cocoli!
40Che bei fantolini!
Che brio! che graziete!
I xe più de sete.
Nè mi no v'esagero
Per farve la corte,
45Che a i vati fatidici
Se averze le porte
Del tardo lontan
Co i ga el goto in man.
Ridèmo, chiassèmo,
50Amici in sto dì;
D'acordo bevèmo.
Ma el primo sia mi,
Be Baco devoto,
A darve del moto.