A proposito d'uno sproposito
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Tiro | Edission e fonte ▼ | Carmen baccellare → |
.jpg)
Et quicumque audierit eorridebit mihi.
Gen. XXI, 6.
EL sta mal. El sta ben. Per la so età
El xe massa robusto. El xe cadente.
El camparà cent'ani. El morirà.
El magna tropo. Ciò, no 'l magna gnente».
Queste le xe le ciacole che i fa
A malapena che me dòl un dente,
Sia malegnazo la curiosità
De sta libera stampa impertinente!
Ma l'Orchiàtro Petazzo che me cura
Da dopo che Laponi el xe andà via,
Me dise: «Santità, gnente paura,
Perchè el so mal la xe una malatia
D'un mal ch'el va, ch'el vien, ma che nol dura
E ch'el so nome xe nevrastenia».
Cossa? Nevrì... Nevrò... Nevrastenia?
Gò inteso; con do ene e l'esse impura,
Ma che verbi, de Dia, contro natura
Se ripara in pipì... psicologia!
Scienza? La sarà scienza e cussì sia,
Anca si ben la xe una secatura
Per la fufa de far bruta figura
In qualche scapuzzòn de ortografia.
Ma mi no falo mai, dise la zente,
E i me gà dito che sta verità
La xe un dogmo paràclito evidente,
E sia! Ma geri l'altro gò tirà
Una sagra zavàta a l'inserviente
E gò intivà... indovina? El papaga!
E quel maròn che gavarè notà
Col petirosso in màgio? Galo in mente
Che tòco d'asenada ultrapotente?
E po' sora una pianta! Proprio là
Co' fina i ranabòtoli lo sa
Ch'el petirosso ariva solamente
Coi primi fredi e svola sempre arente
E le sciese de spini e via ch'el va?!
Bestia! Che i compatissa st'eresia,
Infalibil secondo la Scritura,
Ma falsissima in prosa e in poesia.
E ti, oseleto mio, scusa e procura
De farme sempre bona compagnia...
E ben? Ma indove xèstu, creatura?