A sior Toni Regazzi, avendome invidà a magnar le fritole (Brindisi)
|
1902
|
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← A sior Mandragola Raimondo, nel zorno del so natalizio (Brindisi) | Edission e fonte ▼ | A sior Piero Pain, nel zorno del so natalizio (Brindisi-scherzo) → |
Tose che serva
a drita, a sanca,
vestìe de nero,
traversa bianca,
cussini sparsi
per i divani,
chè no se maca
i deretani,
piture antiche
del çinqueçento
messe in cornise
d'oro e d'arzento,
gran abondanza
d'arzenteria,
roba finissima
e garantia,
speci e cristali
fati a Muran,
veludi e merli,
ricami a man,
festa da balo
da gran signori,
cantanti çelebri,
bassi o tenori,
violini e flauti
de gran cartelo,...
no ghe xe çerto
in sto tinelo;
ma mi, no dubito,
gnanca el Sultano
no ga ste fritole
in fondo a l'ano,
e se podessimo
mèter per caso
un de sti piati
soto el so naso,
lu, senza dubio,
dal gran contento,
casca delongo
in svanimento
dixendo: «Caspita,
» sta gran pietanza
» le gatorìgole
» fa su sta panza;
» in tutto el tempo
» che go regnà
» un piato simile
» non go çercà!»
e po el Sultano,
omo de mondo,
farìa qua subito,
ben ciaro e tondo,
un mato brindisi
al nostro Toni
che me ga oferto
sti fritoloni.
Ma se 'l sultano
da qua xe assente,
se qua invidada
no ghe xe zente,
de far un brindisi
çercarò mi,
dixendo a Toni
proprio cussì:
Che Dio lo tegna
per tanti ani
pien de salute,
senza malani,
che no che vegna
mai 'na schinela
e che ghe cressa
bezzi in scarsela.
E co sto augurio,
fato de cuor,
me bevo un goto
de sto liquor.
Venezia 31 dicembre 1902.