Alla morte del Cazzon
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo IV, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 4.djvu |
| ← El mio povero Cazzo dopo alquante | Edission e fonte ▼ | A sto Mondo cos'hoggio più da far → |
Alla morte del Cazzon
De quel celebre poeton,
Ch'hà lodà tanto la Dona,
E 'l so culo, e la so Mona,
5Tutte quante le sgualdrine,
Le più scelte, e paregrine,
Come tante desperae,
Alla Luna le xe andae.
Là le hà fatto 'l so conseggio,
10O sia congrega, o colleggio,
E le gà mandà 'na parte,
Che sia fatto con bell'arte
Un deposito sontuoso
A sto Cazzo lussurioso.
15Ma una siora là dall'osto
A sta parte se gà opposto,
E gà dito in do parole,
Che le varda, ch'elle sole
No poderà supplir a tante spese,
20Perchè piene le xe de mal Francese.
Gà risposto una puttana,
Ch'ella sola giera sana,
Che se fà dei bezzi assae
Anca a forza de menae,
25Che chi hà voggia de sborar
Per el più se 'l fà menar;
Tanto, che per sta parlada
Quella parte xe passada.
Hà parlà pò l'Abadessa,
30O sia gran sacerdotessa,
Che xe giusto far onor
A sto Cazzo fottidor;
Se l'hà fatto opere bone
Lo sa ben le nostre Mone,
35Che per farne carità
El s'hà tutto consumà.
Sù via Sorelle
Graziose, e belle;
Andemolo a levar,
40Andemolo de fiori a incoronar.
Tutte gà comprà dei fiori,
E dei balsami, e liquori
Per andar a imbalsemarlo,
E de fiori a incoronarlo;
45Coi cavei zò per le spalle,
Come tante gran cavalle
Messe tutte quante in schiera
Le xe andae dove, che 'l giera;
E, co 'l morto le hà trovà,
50Le l'hà tutto imbalsemà,
E dei fiori con la fogia
Le gà fatto la so zogia.
Terminada sta fonzion
Hà sfillà la procession.
55Stava a pianzer i so dani
El suffraggio dei ruffiani,
E sti poveri fradelli
Xe andà avanti coi pennelli,
Dove giera sù depenti
60I miracoli, e i portenti,
E ghe giera fatte a sguazzo
Le bravure de sto Cazzo.
Se vedeva s'un pennello
Delle gran menae d'Osello,
65E de là 'na Donna nua,
Che tioleva 'na fottua,
In t'un altro 'na Donnetta,
Che s'alzava la Carpetta,
E sporzendoghe 'l martin
70Lo tioleva sù a passin.
In tel quarto sù appariva
Più d'un Vasco colla Diva,
Che per darghe più trastulo
Ghe 'l metteva tutto in Culo.
75Se vedeva meste, e sole
A vegnir dell'altre Scole;
Come tante gran marmotte
Xe comparsi i magnapotte,
Che gavea perso 'l solazzo
80De magnar sora sto Cazzo.
Tutti lagreme, e dolori
Xe comparsi i fottidori,
E 'l so Cazzo in man bazotto
Ghe servìa de candelotto.
85Portava 'l morto quattro puttane
De quelle in Calle de Carampane,
E drìo gh'andava le buzarone,
Che stà in corte delle colone;
Quelle delle Case niove
90Se sentiva pregar Giove,
Che per grazia de sto Santo
Elle sole avesse 'l vanto
De goder bona salute,
E far bezzi più de tute.
95Quà de tutti i malcontenti
Se sentiva i gran lamenti,
Ma le Donne più de tutto,
Che restava a muso sutto,
Le ghe andava drìo pianzendo
100E le man, e i pie battendo.
Chi se dava dei sgraffoni,
E chi al cul dei pizzegoni,
Chi i cavelli se cavava;
Chi la Mona se pelava,
105Chi diseva, oh che gran caso;
Ch'è successo al nostro vaso!
Un gran Cazzo avemo perso,
Che per dretto, e per roverso
Xe stà sempre benemerito
110Del Davanti, e del Preterito.
Arrivade in t'un campiello,
Dove giera un capitello,
Sora quello le l'hà messo,
Acciò a tutte sia permesso
115De poderlo ben vardar,
De basarlo, e de toccar,
Co speranza, ch'a segnarse
Le podesse liberarse
Da quel mal, ch'un dì la peste
120Gà sul Cul fatto le creste.
Con cuor umile, e devoto
Delle altre fava voto,
Che guarindo in quel momento
Da un potente scolamento
125S'averìa taccado al Collo
El valor del primo nollo.
Dopo fatte ste orazion
Tutte quante in zenocchion
Cussì in concerto le hà bù a cantar;
130Sto santo Cazzo vegnì a adorar.
Xe andà prima quella bella,
Che se chiama Cattinella,
La seconda assae giuliva;
Che gà nome siora Oliva;
135Xe vegnù pò tutta seria
Una tal siora Valeria,
Dopo in seguito la Spina,
E una tal siora Rosina;
E pò quella del Priè,
140Che gà in testa un bel topè.
Infin quella del Venier
Assae brava nel mestier;
Ghe xe andà anca Valentina
Lavandara paregina,
145Che xe amiga assae cortese
D'un Lacchè a Sant'Agnese,
Che gà nome sior Tonin,
E ghe piase solo el vin;
Donne, e ziogo, e gnente più;
150E l'è un bel Beccofottù,
Che più volte al Leon rosso
Se la fotte a più no posso.
Dopo, che le l'hà incensà,
E le l'ha tutte adorà;
155Una alfin l'hà tiolto in man,
E chi in basso, e ch'in sopran,
Le gà dito tutte a coro
Sto bel cantico sonoro.
Quante, che semo,
160Nù ve adoremo
Cazzo forte, ed immortal;
Solennissimo Cotal;
Semo certe per le tante,
Ch'avè fatto, opere sante,
165Che de Venere nel Cielo
Siè svolà da vero Oselo,
Cazzo amoroso,
E generoso,
Cazzo forte, ed immortal;
170Solennissimo Cotal.
Se avè fatto opere bone
Lo sà ben le nostre Mone;
Che per farne carità
V'avè tutto consumà.
175Le l'hà fatto pò bel bello
Tirar zò dal Capitello,
E con bella ordinazion
Xe tornà la procession;
Quando addosso a ste persone
180Xe arrivà le Zentildone,
E con aria da Sovrane
Le gà dito alle puttane;
Vìa de quà, ch'a nù s'aspeta
Sto gran Cazzo del Poeta;
185Questo è un Cazzo d'una mente
Ch'hà prodotto specialmente
Per la ricca nobiltà
Un'idea de libertà,
E vù altre no sè degne
190De portar delle so insegne.
Xe saltà una scarabazza
Delle meggio della piazza,
E hà parlà fuora dei denti
A ste Dame prepotenti;
195Per vù altre Zentildone
Xe falìe le nostre Mone,
Zà debotto per le Dame
Nù morimo dalla fame,
E per farne sempre torto
200Volè ancora el Cazzo morto?
Gà resposto là in quel ponto
Una Dama de gran conto;
Per vù altre Donne ignobili
No xe fatti i Cazzi nobili,
205Tiolè quei dei Artesani,
E dei Frati Francescani,
Tiolè quei dei cava-fango,
Nò de quei del nostro rango.
De trionfo una barona
210Gà resposto a sta matrona;
Da nù altre buzarone
Vien de tutte le persone,
Vien dei Preti, vien dei Frati,
Vien dei Omeni togati,
215Vien Facchini, vien Staffieri,
Ma vien anca Cavalieri,
E sto Cazzo veramente
El xe nostro bon parente.
Quà xe nata una baruffa,
220E s'hà fatto una gran zuffa,
E le Dame a quella, e questa
Gà dà i torzi sulla testa.
A ste tante bastonae
Le puttane xe scampae,
225E per causa de sta guerra
Le gà tratto 'l morto in terra,
E le Dame in quei criori
L'hà dà in man ai fottidori.
Le hà mandà pò un Omo a pìe
230A chiamar le chieresìe
Dei so Cavalieri erranti,
Che in servir xe più costanti,
Per servirghe de conforto,
E per dar l'incenso al morto.
235Via de tutte le locande
Le hà chiamà le Scuole grande
De virtuose, e de cantanti,
Ballerine, e Comedianti,
Perchè queste le cantasse,
240E drìo al morto le ballasse.
Le hà invidà coi so biglieti
La fraterna dei Poeti,
Perchè questi a sto Cazzon
I ghe fazza l'orazion.
245Le hà volesto dei soleri,
Dove sù dei Cavalieri
Con le Dame se vedesse
Tutte quante al vivo espresse,
A sentir con allegrìa
250De sto Cazzo la poesia.
In t'un altro Preti, e Frati,
E Poeti, e Letterati,
Che a una tavola rotonda
Se vedesse, ch'i fà ghionda,
255E ch'i fà motti diversi
Ascoltando quei bei versi.
In tel ultimo i Dottori,
E i più grandi Proffessori,
Dove in mezzo i disputasse,
260E che tutti li ascoltasse,
E sentindo quei so tratti
I ridesse, co fà matti.
Vestìe a lutto andava avanti
Le gran Dame coi so amanti,
265Drìo gh'andava anca i Poeti
A cantando dei verseti;
Le brillanti ballerine
Colle belle gamboline
Le gh'andava drìo ballando,
270E de quà, e de là saltando.
Co sto bel compagnamento
Le xe andae in t'un Convento;
E le hà messo quel Cotal
In t'un vaso de cristal.
275Tutti un Inno gà cantà,
E le Dame hà scomenzà;
Salve, o Cazzo venerando
D'un Poeta cussì grando,
Ch'hà fondà la so Scrittura
280Sulla leze de natura,
Che ne gà sciolte dai lazzi,
Dove pena i visdecazzi,
E con quella so poesìa
N'hà schiarìo la fantasìa,
285E che senza farne ingiuria
N'hà cressudo la lussuria.
Coi so animi sinceri
Hà cantà pò i Cavalieri;
Viva 'l Cazzo del Poeta,
290Ch'hà cantà sempre alla schieta,
Ch'alle Donne i pregiudizi
Lù gà sciolto, e rutti i vizi,
Che l'hà rese assae più amabili,
E più docili, e trattabili,
295E le hà fatte de bon cuor
Col so bando dell'onor.
Co 'na vose assae sonora
Le cantatrici ancora
Hà dito 'l so versetto;
300Caro Cazzo benedetto
Preghè 'l Ciel, che'l paron viva
Perch'in lode ancora'l scriva
Della Mona, e dei so peli,
Delle tette, e dei cavieli,
305E del Cul, ch'in do diviso
L'è un boccon da Paradiso,
E siben l'è senza Cazzo,
Che nol perda 'l talentazzo
De far sì, ch'ognun s'invogia
310De bramar la nostra zogia.
Fra' i poeti un Dotoron
Gà pò fatto st'orazion
D'un poeta, che s'onora,
Onoremo el Cazzo ancora
315Perchè questoerrata corrige originale è stà l'Apolo,
Che dei gusti hà parlà solo
Sora 'l monte d'Elicona
Per lodar tanto la Mona,
Tanto, che nu' altri poeti
320Presso lù semo pocheti,
Che per quanto i nostri versi
I sia pure netti, e tersi,
Co no i parla della Mona
No li gode una persona,
325E gnessun li vuol scoltar,
Co no i tratta de chiavar.
Terminada l'orazion,
E fenìa la procession,
Quelle Donne hà comandà
330D'assoluta podestà,
E hà segnà de bon inchiostro,
Che'l sia messo là in t'un chiostro
Fin a tanto, che sia fato
Un Deposito onorato,
335Che ghe serva de memoria,
E ghe sia d'eterna gloria
Iscrizion a quel Deposito,
Che parlasse sul proposito.
Sora questo no ghe giera,
340Nè un trofeo, nè 'na bandiera,
Ma diversi Cazzi duri,
Ch'averave sbusà i muri,
E de fazza a bocca averta,
Ch'aspettava la so offerta,
345Tutte al vivo se vedeva
Delle Mone, che pianzeva.
Sora vìa de quei Cazzetti
Giera messo dei Culetti,
Che pareva, ch'i aspettasse,
350Che qualcun li buzarasse.
Stava in mezzo a ste figure,
Come un gran Dottor in jure
El gran Cazzo del Poeta,
Come un vero Anacoreta,
355Colla testa a picolon
Per mostrar d'esser paron.
El gaveva sulla panza
E anca attorno in abbondanza,
Nò scriture, nè librazzi,
360Ma dei Culi, Mone, e Cazzi,
Per far veder, ch'in sta scienza
El gà buo la preminenza.
Una virtuosa Battola
A lettere de scatola
365Piena d'erudizion
Gà fatto sta iscrizion.
Quà del gran Baffo ghe xe 'l Cazzo morto,
Ch'aspetta da cogion d'esser risorto.