Amor! amor! amor!
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Basi... gnente | Edission e fonte ▼ | Riflession semi-patetiche de uno in cimbalis! → |
Quando fra scure nuvole
Più trista par la Luna
E mi soleto in gondola
Ziro per la laguna...,
Co l'aflizion ne l'anima,
Co la tempesta in cuor,
In tanta solitudine,
Vado ciamando: ― Amor!...
Amor!... Amor!... ― Ma 'l perfido
A mi no me risponde...,
Nè trovo chi vol dirmelo
Dove colù se sconde!...
Come xe mai possibile
De viver senza Amor...,
Quando ridoto in lagreme
Me core el sangue al cuor?
L'eco lontan, che replica
El stesso mio lamento,
Me mete in corpo i grizzoli,
Me giazza de spavento!...
Cossa volè..., m'imagino,
Quando el risponde: ― Amor? ―
Che dir l'intenda: ― O misero,
Mètite in pase el cuor!
Se no ti xe più zòvene,
Se no ti xe più belo...,
Vecio, sperar xe inutile
Che 'l torna..., el baronçelo!
Dunque, no pianzer!... Càlmite...,
Mètite in pase el cuor!...
No gh'è per ti più palpiti,
Per ti no gh'è più Amor!