Amor, Nina, me stuzzega
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Amor, Nina, me stuzzega
Perchè continua a amarte,
Ma el to contegno, o barbara,
4Me stimola a lassarte.
El to viseto amabile
Per mi xe una magia,
Ma quel to cuor volubile
8Xe pien de tirania.
Incanta el to gran spirito,
Le paroline e i vezzi,
Ma chi pol mai resister
12Ai tanti to disprezzi?
Per ti d'amor savario,
Ma senza compassion
Ti tuto a l'incontrario
16De mi ti fa sbolzon.
Ti fa de mi un ridicolo,
Che tropo xe indiscreto,
Epur senza dolermene
20Sofrirlo me assogeto.
Me bastaria sensibile
Trovarte al mio dolor,
Ma co tut'altri prodiga,
24Che a mi, ti xe d'amor.
A Nane, a Checo, a Momolo
Ti fa tanto de ciera,
E mi, più che te cocolo,
28Più ti me trati altiera.
No gavarò quei meriti
Che ga forsi sti siori,
Ma in sen go un cuor che spasema
32Per ti più assae de lori.
Ghe cedo anca in politica,
Che l'adular detesto,
Ma in fedeltà li suparo,
36Ch'è più de tuto el resto.
E se no son un zovene
De quei de primo pelo,
No so po gnanca un vechio
40Da farghene bordelo.
Varda chi donca merita
Da ti la preferenza,
Se quei che xe più zoveni,
44O quel che à più prudenza.
Ah, Nina mia, rissolvite,
No farme più penar,
E no ridurme al merito
48D'averte da lassar.