Arringa sul Decreto di Abolizione de' Frati/04
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← III | Edission e fonte ▼ | V → |
Vostre Zelenze le ga tuto in vista
Quelo che in la Scritura se contien
3Del Segretario, e del so Computista;1
Le ga la Lege, le ga tuto el pien
Del calcolo, le ga i sugerimenti:
6Ma no le se ne acorze del velen?
Su tuto ghe farèmo i so comenti,
E vederèmo un poco se al confronto
9Rege sta pianta su i so fondamenti.
Ele me vede qua disposto e pronto
A smentir con tre Capi de converso
12Sti gran sforzi d’inzegno. Onde a bon conto
Principio da le Legi, dove imerso
Ghe xe talmente sto sior Segretario2
15Come se ognuna avesse un stil diverso.
Ma mi, che no ghe trovo sto divario,
M’ataco a le do sole principali3
18Su sto afar emanade in tempo vario;
Perchè come i più gran fiumi reali,
Scorendo gonfi, nu vedèmo spesso
21Che se va diramando in più canali,
Cussì da ste do Legi che gh’ò espresso
Molte ghe ne xe nate e diramade
24Che ’l spirito le ga tute l’istesso.
Per no tegnerle donca incomodade
Superfluamente, de ste do dirò,
27E del Decreto4 le sarà informade,
De la sessanta sete parlerò;
Le imagina che l’ultima mi intendo
30Sora la qual la Causa tratarò.
Co gh’ò da dir el ver, mi no comprendo
Come ste Legi s’abia adulterà
33Co sti Decreti che se va facendo.
Se un’ochiada, a la prima, le darà,
A quela Parte del mile tresento
36E trenta tre, ele ben le vederà
Che in tuto quel che se contien là drento
Altro no se vol mai significar
39Che una Riforma o sia Regolamento;
Perchè se la vorèmo esaminar
Su i Loghi Pii, la fa sta restrizion:
42Che in Rialto e in Cità mai più acquistar
No i possa; e gh’è de più sta prescrizion:
Che quel ch’ereditasse, in ani diese
45L’abia da vender senza alterazion.
Co sora questa no ghe xe contese,
Ne l’altra cinquecento trenta sie
48Tute ste cose le ghe xe comprese.
Dopo, perchè più no prendesse pie,
Anca tuto el Dogado la interdise
51Ad ogni istituzion d’Opere Pie:
E venduti (a majuscole e precise
Note) i Fondi venienti da Legati
54Dopo ani do, la vol, nè più la dise.
Vostre Zelenze adesso da sti dati
Le dirà, se ghe vegna in conseguenza
57Desfar la Religion, spogiar i Frati?
Ma prima che le fazza sta Sentenza,
Le lassa che ghe diga tuto el resto,
60Perchè le abia l’intiera conossenza
De quelo che più importa; che xe questo:
- Note a cura de Bartolommeo Gamba