Arringa sul Decreto di Abolizione de' Frati/09
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← VIII | Edission e fonte ▼ | X → |
Ma prima a sto de più. Co sta Scritura,
Scortà dai Savj, el novo Magistrato
3De le Man-morte destinà a la cura,
El s’à presentà subito al Senato
Aciochè in conseguenza decretà
6Fusse sto afar per ben de tuto el Stato.
In undese Capitoli segnà
Xe stà el Decreto de Regolazion
9Che in quel dì el Pregai à balotà1
Dopo de che per la so aprovazion
L’è stà portà al Consegio, dove preso
12(Le noti) per la so’ aprovazion l’è stà.2
Questo xe ’l primo caso che mi ò inteso
Dove cussì a la cieca sia deciso
15D’un afar drento al qual ghe xe compreso
Tuto quelo che xe de più preciso
In un Governo, e gh’è de più vital
18In modo che nol pol andar diviso...
Me spiego... El gius divin e ’l natural.
E tuto questo per tegnir segreto
21A la Sovrana Autorità el mortal
Orendo colpo, a dirghela in concreto,
Che da un Secolo e mezo e più in Pregai
24Su sto afar gh’è stà dà con quel Decreto.
E questa xe l’origine dei guai
Tra quali involta la Libertà publica
27La pol tremar de no sortir più mai,
Co la Sovranità de la Republica
No la sostegna, salvo quel Edito
30Che sol forma le Legi e che le publica.
Questo xe quel arcano che gh’ò dito,
Quel nodo, quel mistero sì l’è questo
33Che mi per rischiarar resto in sto sito.
Siben che so che riussirò molesto
Su sto tema a qualcun de sto Consesso
36A tempo e logo pur ghe dirò el resto.
Sto tal regolamento che gh’ò espresso
Su i Loghi Pii e sora le Man-morte,
39Dai Savj machinà drento el Recesso
De quele a ogni altro impenetrabil porte,
Drento le quali un despotismo ingiusto
42Tra indegne intolerabili ritorte
Tien incepà cussì sto Ceto Augusto,
In altri tempi tra più gravi cure
45Ne le massime soe fermo e robusto;
Che le cose più serie e più madure,
O tra privati avari fini involte
48Le cambia le sostanze e le figure,
O le marcisse in un casson sepolte
Con gran dano del Stato, e con sorpresa
51De le Nazlon più iluminade e colte;
Sta tal Regolazion, replico, presa
E dal Comun laudada, Dio volesse
54Ch’anca la fusse a norma de l’estesa
Eseguida a puntin, nè sucedesse
Sto scandalo in Republica sì novo
57Che tut’altro a l’oposto se facesse!
Che da qualunque banda che me trovo
Vedo una delusion chiara e patente.
60In tuto quel ch’è fato mi ghe trovo,
Che ’l Consegio e ’l Senato apertamente
Xe stà inganà; e sora de sto ponto
63Una prova le ga tropo evidente.
Cos’è sto novo Ofizio de un Agionto
Che da so posta ereto Ditator
66Al somo del poter se vede zonto?
Che furente con smaco e disonor
Del Consegio e Senato, a so capricio
69De le Legi el se fa conculcator?
E che abusando del concesso ofizio,
Confuso el manda el sacro col profan
72Tuto indistintamente al precipizio?
Che con un despotismo da tiran,
E drento i Tempj e sora i Sacerdoti
75A tuto impunemente el mete man?
Che adulterando l’intenzion dei voti,
Dei gran nostri proavi in sin la gloria
78El cerca de oscurar nei pronipoti?
Ma se no perderò da la memoria
El filo de la tela che mi ordisso,
81Le sentirà in progresso de sta istoria
Quel, che a solo pensarlo inoridisso!
Perchè le conseguenze gravi tropo
84De sto geloso afar vedo e capisso,
E qua vien tuto della causa el gropo.
- Note a cura de Bartolommeo Gamba