Arringa sul Decreto di Abolizione de' Frati/15
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← XIV | Edission e fonte ▼ | XVI → |
Essendo stato altre volte provisto
Intorno a le alienazion, de
3Beni laici. Dimando: co avè visto
La data in sto Decreto, chi mai xe
Quelo che à decretà? El Legislator
6De sta Lege chi xelo? Nol savè?
Un omo come vu, un Consultor
Dei primi se pol dir ch’ancuo sia in grido,
9No sa chi de sta Lege sia l’autor?
Vel dirò mi, ma dopo mi ve sfido
A smentirme, che no me fe paura
12Con tuto che vu abiè tanto partido.
In Pregai xe stà fata sta Scritura,
Nò nel Mazor Consegio; ma tiremo
15De longo, seguitemo la letura.
Se le permete, vòi che se fermemo
Su ste parole: Per tuto el Stato
18Nostro. Quando che ben esaminemo
Ste tre parole in boca del Senato,
Mi no so dir, se ben le ghe convegna
21In via de Subalterno e Delegato;
Vostre Zelenze za no le se sdegna
Se libero ghe parlo, e se ghe digo
24Quelo che l’Aristocrazia m’insegna;
Perche per andar fora de sto intrigo,
Che sto gran Consultor ne va tramando,
27Le senta come presto mi me sbrigo:
Quando el Mazor Consegio à dà ’l comando
Che in Rialto e In Cità fusse proibii
30I novi aquisti che de quando in quando
Podeva andar facendo i Loghi Pii,
E co la Podestà Legislativa
33Sti aquisti nel Dogado i s’à bandii,
Come se dà, che sta facoltativa
Nel Delegato al par del Delegante
36La se estenda, nè la se circoscriva
A tenor de le savie e sacrosante
Vostre Costituzion, che limitadi
39Vol i confini in le diverse e tante
Materie demandade anca al Pregadi?
Ma de sto abuso ghe dirò in progresso
42Come el sia andà cressendo a gradi a gradi.
L’anderà Parte... Caro vechio, adesso
Fermève per un poco, perchè qua,
45A dirla, gh’ò da far qualche riflesso.
Manco mal che in sta Parte se ghe fa
Sta gran basa al Paron de la Republica,
48A la legislativa Podestà,
A l’oracol de la mente publica,
Da la qual solo ne pol derivar
51Tute le Legi che se forma e publica;
Qua se dise, che senza derogar
A le Parti in sta materia prese...
54Cosa disela mo? cosa ghe par
De ste espression? Come se dà che intese
I Avogadori i le abia e no intromesse
57Per dover del so ofizio apena estese?
Dopo de tute ste bele promesse
Prego Vostre Zelenze star atente
60A ste parole qua de soto espresse,
Come se quel de sora fusse niente:
Che senza derogar.... Sta bagatela!
63A le altre Parti prese a la presente
Non repugnanti, et cetera. Ela bela?
E ch’el Mazor Consegio strenza i denti
66Se anche le Legi soe se ghe scancela!
E che ’l sospenda i so’ risentimenti
Se la so’ autorità xe vulnerada
69In tempi assae dai primi diferenti!
Ma sta Lege, che vedo qua citada
Del mile cinquecento trenta sie
72Xe dal Mazor Consegio publicada
A solo ogeto che l’Opere Pie
No le arivasse a un tropo ingrandimento,
75E anca al Dogado la ga tolto el pie.
Vorìa saver per mio amaestramento
Come el Franceschi possa mai de mai
78Meterghe a fronte sto comandamento,
Cioè sto gran Decreto del Pregai,
Senza che ne risenta un grave smaco
81Dal qual ne nasserìa pur mile guai
Al gius Sovran; ma per serarghe el saco
Senza ch’el filo a l’ordimento rompa
84Le stia a sentir dove che mi l’ataco;
E lasso, se ’l ga cuor, ch’el m’interompa.