Barufa de done

by Attilio Turco

3 Barufa de done Sonetti Veronesi Sonetti Veronesi/Parte III - Verona So mojer Margarita e Febo Attilio Turco 1924 XX Soneti veronese

Indice:Attilio Turco - Sonetti Veronesi.djvu

Attilio Turco ―  Sonetti Veronesi  ― Parte III - Verona

Barufa de done

1924

Edission original:	Attilio Turco, Sonetti Veronesi, Verona, Tipografia Operaia, 1924
Fonte:	Indice:Attilio Turco - Sonetti Veronesi.djvu

←  So mojer

Edission e fonte ▼

Margarita e Febo  →

BARUFA DE DONE

L’altra matina, sarà stà le nove,
     Le s’à incontrado sul canton del Gheto
     E li le se n’à dito par dispeto...
     Un mostro¹ l’à sigà: momenti piove!

La gente par spartir no la se move;
     Ele intanto, con n’odio malingreto,
     Le se sbregava² còtola³ e corpeto
     E le andava a fenir mi no’ so ’ndove!

— Bruta sà! Bruta là! te gh'è i morosi! —
     E zo pache e tirade de cavei...
     Tuto intorno ’na mota de curiosi,

Tuto intorno 'na mota de putei!...
     No gh'erà nè in borghese, nè in montura,
     Un vigile o ’na guardia de questura!

---

Note

1. Mostri ― ragazzi di strada;
2. sbregava ― strappava, lacerava;
3. Còtola ― sottana.