Belle, e ricche lagune
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← A i mie dì n'habuo tre bone notte | Edission e fonte ▼ | Capitoli → |
Belle, e ricche lagune,
Donde sta la mia Donna,
Ch'avanza el Sol, onde forte suspiro,
Le mie speranze brune,
Contra si gran colonna,
Che'l dì e la notte l'intelletto ziro,
E'l mio pensier amoroso destiro,
Per farme so molecha,
Dolci, bianchi dentini,
Lavri, che par rubini,
Che le buele, e'l cuor si me dessecha.
Deh ne priego suor cara,
No sie a darme la vita cruda, e avara.
Si l'è per mio destin,
Besogna haver pacientia,
Spetando'l zorno, che vegnì cortese;
E far gracia al meschin,
Che ve fa reverentia;
Suplicando con le braxze, destese,
Imparando à mie spese,
No esser cosi audace;
Mo chi se tignerave
Sotto dusento chiave
Si ben, se pertinace,
No ve amar sempre mai,
Che un di son certo, che inscirò de guai.
Vignera tempo anchora,
Che sarè mansueta;
Habiando del mio mal, qualche pietae.
Donca spetterò l'hora,
Dolce mia raiseta,
Che slarghe un poco la vostra bontae,
Sia d'inverno, o d'instae;
No fo mai tardi el ben
A chi da seno ama,
Che stago sempre in fiama,
Perche'l mio petto, de fuogo xe pien;
Oime chel vostro viso,
Si me fa refudar el Paradiso.
Canzon, va da Madonna in zenochioni,
E dighe'l mio dolor;
Che si no la m'aida, e perdo el cuor.