Brindisi (Riccardo Selvatico)

by Riccardo Selvatico

3 Brindisi Riccardo Selvatico XIX Poesie

Indice:Selvatico - Commedie e Poesie Veneziane, Milano, Treves, 1910.pdf

Riccardo Selvatico

Brindisi

XIX secolo

Edission original:	Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910
Fonte:	Indice:Selvatico - Commedie e Poesie Veneziane, Milano, Treves, 1910.pdf

Edission e fonte ▼

BRINDISI

pronunciato al tradizionale Banchetto dei Regatanti.

Gh'è certi che trema
     Vardandose a torno,
     E visto ch’el mondo
     Camina ogni zorno,

Ghe par che Venezia
     Un dì cussì bela,
     Un poco a la volta
     Se cambia anca ela.

Mincioni, mincioni,
     Lassè che lo diga;
     Venezia no cambia
     Per quanto che i ziga.

Xe andada in malora
     La cale de l’Oca;
     Ma el so Canalazzo,
     Perdio, chi lo toca?

Xe andai in so malora
     Festini e ridoti,
     I salti, le sagre,
     Le forze, i casoti:

Va ben, ma gh'è sempre
     La nostra Regata,
     Gh'è sempre la festa
     Che gnente ghe impata.

Velada, paruca,
     Capelo a rafiol
     Xe morti e sepolti;
     Ma gh’è el barcariol!

E fin che sta razza
     De brazzi e polmoni,
     De omeni tressi,
     Sbragioni ma boni,

In fin che sta razzza,
     Ripeto, xe quela,
     Venezia no cambia,
     Venezia xe bela!