Che no parla? mi no parlo

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora da vegner rileto.

Pietro Buratti

Che no parla? mi no parlo

Edission original:	Collezione delle migliori opere scritte in dialetto veneziano, Volume ottavo: Poesie di Pietro Buratti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 8.djvu

Edission e fonte ▼

[p. 37 modifica]

CANZONETTA

PER MUSICA

Che no parla? mi no parlo;
     Co le done son discreto,
     El mio forte xe el secreto,
     4Nina mia, no dubitar.
Ma l'amor, co l'è de quelo,
     E co l'anema l'à ponto,
     Assicurete che sconto,
     8Cara Nina, nol pol star.
Basta un moto per tradirne,
     Una languida ochiadina,
     Una meza tocadina
     12Che te daga de scampon.
Posso ben per qualche volta
     Far el bravo, el disatento,
     Ma po capita el momento
     16Che me squagio da minchion.
Per esempio, co te vedo
     Qualchedun tropo vicin,
     Mi me sento un bruseghin
     20Che me inquieta e me fa mal;

[p. 38 modifica]

E xe alora che me missio
     Cambio ciera, levo suso,
     E te fazzo bruto muso
     24Per paura de un rival.
Che no parla? Mi no parlo,
     Sarìa proprio un omo indegno,
     Ma che tasa, no me impegno
     28O le man, o i ochi, o el cuor.
Tropo, cara, ti me piasi,
     Tropo inquieto son per ti
     Per esiger che ogni dì
     32Staga sconto el nostro amor.