Da l'ombra al sol
|
Edission original: |
Molena Spinacarpio, "Bordizando - Rime veneziane", 1903 |
|
Fonte: |
http://invenessian.blogspot.com/2010/08/molena-spinacarpio.html |
| Edission e fonte ▼ |
Mi, co vado a l’ostaria,
perdo tuto l’apetito,
e anca i piati via tiraria
4perché gnente i fa pulito:
sorbo el brodo a boca mola
perché el sa da sbrodeghin,
le minestre me par cola
8e le sa da pignatin.
E xe stopa o siòla el lesso,
né gà el rosto più costruto,
e xe el frito un slimeghèsso
12imbombà de vecio struto:
scarta e fiàpa la salata
la xe sempre da curar,
e gh’è i tochi de patata
16che i xe mezi da pelàr.
La bisteca me par cavalo
e po’ tremo, nel spezzato,
che sia forsi, cussì in falo,
20sbrizzà drento qualche gato:
el formagio xe sgnanfèto,
e el salame sarà bon
ma, de porco, ghe scomèto,
24no’l conosse ch’el paròn.
Gh’è l’oposto de sto qua
co’ a disnàr so da la Nina:
sempre in punto la me fa
28roba fresca e roba fina:
quela sì che xe cusìna!
E po’ dopo, a dirla qua,
el visèto de la Nina
32l’osto çerto no lo ga.