Do vilegiature
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Sfogonada | Edission e fonte ▼ | Romanzi novi → |
.jpg)
. . . . . . . che anca chi
Gh'è una gabola anmò contra de mi.
C. Porta. Desgr. de G. Bongee.
LU da Castel Gandolfo el va a la Ricia,
Lu el se scaròza a Tivoli e Frascati,
Lu el magna da le muneghe e dai frati
Che zà ghe cresse adosso un po' de cicia,
Ma co' el capita qua' come el se spicia!
Do ciacole, do firme nei ritrati
E allegri! El sbrissa via co' fa i bisati,
Perchè, dirò cussì, el se ne stropicia.
Intanto mi no posso scampar fora
Da sto palazo, che d'agosto scota
E brusa come Sodoma e Gomora.
E cussì, gira gira e fai la rota,
Rengraziemo Gesù perchè finora
A lu ghe toca i freschi e a mi la gota.
Sentì questa: Vien qua una principessa
De no so dove, zovene, ma che
No gavendo putei no so perchè,
La so corona giera compromessa.
Ghe dago udienza dopo dito messa
Che tuti do parlavimo fransè,
Ma dopo el baso ai sagrosanti piè,
Vedo che la me resta genuflessa;
E qua tàca la storia del anfàn,
La vol, per grazia, mama diventar
A tuti i costi... e mi go dito: « Pian!
«Madam, gé vu trebien vostre istoàr,
«Me, pour la robe de l'engrossemàn,
«L'encariqué cést el Segretoàr».
Ben! Co' se dise la bontà del cielo!
Sta dama xe tornà nei so paesi
E giusto in ponto dopo nove mesi,
Indovinéghe? La ga abùo un putelo!
No ve so dir che strazzo de bordelo
Quei popoli, che sbornie e lumi acesi,
Perchè sto erede che li ga sorpresi
El gera grasso e fin come un porcelo!
E ben, cossa disévio? In tanta zente,
Chi nasse nùo, chi nasse col tabaro,
Uno ga la fortuna, un altro gnente.
Cussì el mario, sto toco de somaro,
El ga mandà el regalo competente...
Al sotoscrito? Un corno! Al Segretaro!!!