El Bartoldo

by Berto Barbarani

4 El Bartoldo I sogni Libro III.° — IN CITÀ E IN CAMPAGNA Custosa CONGEDO — L'ULTIMA LEVA Berto Barbarani 1922 XX Poesie veronese

Indice:I sogni.djvu

Berto Barbarani ―  I sogni  ―  Libro III.° — IN CITÀ E IN CAMPAGNA

El Bartoldo

1922

Edission original:	Berto Barbarani, I sogni, 3° Canzoniere, Verona, Mondadori, 1922
Fonte:	Indice:I sogni.djvu

←  Custosa

Edission e fonte ▼

CONGEDO — L'ULTIMA LEVA  →

EL BARTOLDO

(SAGGIO)

1.

Al tempo che Alboin re de Verona,
tegnea le corte¹ su a Castel San Piero,
e l'Adese el girava a la carlona,
strassinando da mato el so poliero,²

vol che da i bagni caldi de Caldiero³
dopo de aver ben bastonà la dona,⁴
el Bartoldo vilan fasesse viaio
co un quarel de polenta e del formaio!

2.

Gh'era in aria un cìo cìo de primavera,
che meteva in boresso tuti quanti;
ci vestiva una giaca più ligiera
e ci andava descalsi e sensa guanti;

i albari metea fiori galanti,
su i castei sventolava la bandiera,
e Bartoldo anca lu come da un vaso,
butava fora brufoli⁵ sul naso...

3.

Par combinar la ghigna de sto omo,
ah! no convien 'conomisar parole,
che çerti mostri sul portal del Domo,
j-era in confronto suo gropi de viole;

la so pele parea fata a spongìole
che j-è quei fonghi che vien zò da Como,
e le mane bison che te le cubi⁶
al bruschineto che se neta i tubi...⁷

4.

La so testa sonèa⁸ la piassè grossa
bocia de anguria mal maurada in tera,
che la porta le plache de la lossa.⁹
Do gran recione a la carabiniera

sora un naso girevole a cerniera
e 'na bocassa che faseva angossa:
oci de fogo, segie¹⁰ de pel mato,
eco Bartoldo e 'l so più bel ritrato!

5.

E pur drento a sta anima vilana
scolpida da un birbante de scultor,
gh'era un vagon de inteligensa sana,
insucarà de spirito inventor —

che anca davanti a un re, a un imperator,
ben o mal che sonasse la campana,
el Bartoldo vilan, ma furbo e forte
l'era bon de zugar galine e corte!

6.

L'era la corte un gran palasso a giorno
sul genere de quei che i fa in confeti:
lôse e giardini ghe girava atorno
su colonete traforade e archeti,

da dove sventolando i fassoleti
quando qualche guerier sonando el corno,
se lo vedea passar arme e bandiera
sul marciapiè del ponte dela Piera...¹¹

---

Note a cura de l'autor

1. le corte: la reggia
2. poliero: puledro
3. Le antiche terme romane di Giunone a sei miglia da Verona sulla via Vicentina.
4. dona: moglie.
5. brufoli: foruncoli
6. che te le cubi: che le paragoni
7. tubi: i tubi della lucerna.
8. sonèa: sembrava
9. lossa: terra umida
10. segie: ciglia
11. Ponte romano sotto il Castel San Pietro.