El Can e 'l Gato
|
Edission original: |
Francesco Gritti, Poesie di Francesco Gritti in dialetto veneziano, Terza edizione ricorretta e accresciuta, Venezia, G. Missaglia, 1824 |
|
Fonte: |
Indice:Poesie di Francesco Gritti in dialetto veneziano.djvu |
| Edission e fonte ▼ |
Oe, per pagar le fritole a l'amigo
Toni ha vendù el so can geri al mercà.
Fasan da la so' corda se destriga,
E torn'a casa! el gera nato là!
5I lo cerca, i lo trova, i te lo liga,
I ghe paga a legnae la fedeltà,
E i lo torna a cazzar, ma con fadiga,
Dal sior conte Susin, che l'ha comprà.
Stava sustando el povero Fasan,
10Sorpreso, desolà. — Dizè compare,
(Ghe sgnaola arente un bel Gaton surian)
V'ha dà da intender vostra siora mare,
Che i paroni ne tegna Gato e Can
Per i nostri bei occhi? Ghe xe care
15Le bestie le più rare,
Fin che i ghe n'ha bisogno; e po schiao siori,
I sacrifica amici e servitori,
Ai bisogni magiori.
La me xe nata a mi, là dal Curato,
20Dopo dies'ani! — Zorzi,
In casa gh'è più sorzi? —
Sior no! "Cazzemo via, donca, sto Gato. —
E vu, sior Fasanelo
Ve credèvi esentà? Se' propio belo!