El Goffredo del Tasso cantà alla barcariola/Canto terzo

EPUB

MOBI

PDF

RTF

TXT

Qualità del testo: sto testo no'l xe stà gnancora trascrito par intiero.

Tomaso Mondini

El Goffredo del Tasso cantà alla barcariola

CANTO TERZO

1693

Edission original:	Tomaso Mondini, El Goffredo del Tasso cantà alla barcariola, dal dottor Tomaso Mondini, e dedicà al lustrissimo, e celentissimo sior Francesco Duodo, Venezia, Lovisa, 1693
Fonte:	Indice:El Goffredo del Tasso cantà alla barcariola (1693).pdf

← Canto secondo

Edission e fonte ▼

Canto quarto →

[p. 34 modifica]

EL

GOFFREDO

DEL

TASSO

CANTÀ ALLA

BARCARIOLA.

CANTO TERZO.

ARGOMENTO.

La Fragia zà à Gierusalem xè zonta,
     Clorinda ghe và incontra con braura;
     Erminia da Tancredi ancora è ponta,
     E lù da un'altra con bella ventura;
     Da Argante co una Pacca fiera, e pronta
     Resta mazzà Dudon bona Creatura;
     E doppo fatti i Funerali degni
     I Nostri và à tagiar in Bosco i Legni.

I

N l'averzer xè zà de i Polastrei,

     Che Febo dà la Biada à i so Cavai;
     Che sponza i Barcarioi Barche, e Batei,
     Che s'averze le porte à i Menacai;
     El nostro Campo par pien de Bordei,
     Pien de sussuro, pien de Tananai;
     Le Trombe in tanto tocca la Sonada
     Con i Tamburi in segno de Marchiada.

[p. - modifica]

[p. 35 modifica]

2

El prudente Goffredo tien in stroppa
     Colori, che vien zoso à tombolon;
     Mà'l fà tanta fadiga, che l'è troppa,
     Quanta che si'l volesse co un'Urton
     Spenzer'i Castellani drio la Groppa
     Quando che i xè cazzai zoso in Casson;
     Al Tocco del Tintin i se la batte,
     E presto i mena, e co ordene le zatte.

3

I marchia via, che i corre anzi, che i sguola,
     E ancora d'andar tardi ghe despiase;
     Mà co se sona el segno della Tola,
     Segno, che in Semenario tanto piase:
     V'è quà quella Città, che ghe fà Gola,
     I vede Coppi, Campanieli, e Case;
     Alliegri tutti quanti in compagnia;
     Gierusalem, Gierusalem i cria.

4

Come quei, che xè stai via sù un Vascello
     Spasizieri, ò Mercanti, ò Marineri,
     Che in Mar i ghabbia bù qualche flazello
     De Borasche, e pericoli assae fieri,
     I butta dà allegrezza via el Capello,
     Se i torna vivi, e sani à i so Quartieri,
     E quando alliegri i vede terra arete
     Ai i patimenti no i pensa più gnente.

5

Quando, ch'ogn'un ghà dà la prima occhiada
     In quelle Sante Mure à torno à torno,
     Tutti daccordo i ghà dà una tremada,
     Che tutto'l sangue se ghà mosso intorno:
     I tien in terra la Testa sbassada,
     Che vardar no i ardisse quel Contorno,
     Dove xè stà, xè morto, e sepelio,
     E pò resuscitao el Fiol de Dio.

6

Come in ti Boschi co xè puoco vento,
     Che se sente quel strepito frà i Rami;
     O come à Lio quando'l Mar gh'urta drento,
     Che quei sussuri el fà, che i par Rechiami;
     Cusì se sente un certo stornimento
     De parole sott'Ose de quei Grami,
     Che mezi alliegri, e mezi spaventai
     I domanda Perdon de i so peccai.

7

I Soldai se descalza la Pedana,
     Che ghe dà Esempio i Capi con prudenza;
     El Capel col Penacchio, ò la Romana
     Se butta via de Testa, e se fà senza;
     Ogn'un vorrave far'una Fiumana
     De Lagreme ispirae da Penitenza;
     Mà come che i sia duri al pianto, i tende
     Da so posta à stizzarse, e i se reprende.

[p. 36 modifica]

8

Caro mio Dio, pol'esser, che in quel liogo,
     Dove'l Sangue per mi havè buttà via,
     No me senta infiammao de santo Fuogo,
     Che pianza fin che resto in Angonia?
     Ah, che sì adesso in pianto no me sfuogo,
     Merito pianzer ben'in Vita mia;
     Pianzi, pianzi mio Cuor, che co sto pianto
     Ti me puol far in sempiterno Santo.

9

In tanto un, che la guardia fà in Cittae
     Sù un Campaniel'alto da un mier de brazza,
     Della polvere'l vede in quantitae,
     Che fatta in t'una Niola in sù se cazza;
     E ghe par, che in la Niola ghe sia assae
     Splendor, quasi del Sol fusse la fazza;
     Mà in sto mentre, che 'l stà co'l Batticuor
     El cognosse chì i xè con so dolor.

10

L'andava in tanto criando; O quanta, e quanta
     Polvere, che xè là fuora all'averta!
     Via, via, Fradelli, vegnì sù à millanta,
     Armeve, defendeve, steme all'erta;
     Po'l replicava più alto; V'è quà tanta
     Zente nemiga, che l'hò descoverta;
     Vella quà, vella quà, serrè le Porte,
     Presto, siè lesti ogn'un, metteve al forte.

11

Le Donne, i Putti, e i Vecchi dà Baston,
     Che per ste cosse no i val tutti un petto;
     In le Moschee i se butta in zenocchion
     A chiamar in agiuto el so Maometto;
     I altri più bravi stà sù saldi, e in ton,
     E zà i s'hà armà la Schena, el Cao, e'l Petto;
     Chì và alle Porte, chì alle Mure intorno,
     E Aladin và per tutto attorno attorno.

12

Doppo ch'i ordeni l'hà distribuio,
     In cima d'una Torre el se retira,
     Che xè appresso à dò Porte, e in caso rio
     Pronto el soccorre, e dà per tutto el smira;
     L'hà volesto menarse Ermina drio,
     Ermina, (ò come che sto Mondo zira!)
     Che doppo, che l'hà perso'l Pare, e'l Regno
     D'Antiochia, dà Aladin la xè in consegno.

13

In tanto con Clorinda una Masnada
     Contra i Nostri vien via, che i trà Cauriole;
     E Argante, quella Birba budelada
     S'hà sconto per pestarghe le Meole;
     Mentre culia và avanti per la strada,
     La ghe dà forza à i soi co ste parole;
     Bisogna ben, che con zioghi de Testa;
     Demo principio prospero à sta Festa.