El Putelo e la Luna
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
1Una bela damina, (e taso el resto
Perchè no vogio chiacole per piazza)
Avudo el primo maschio, ga volesto
Arlevarselo ela, poverazza!
So mario, che gaveva poco sesto,
Siben ch'el gera senator de razza,
El l'à lassada far, ma quel putelo
Presto a la mama à rebaltà el cervelo.
2Cossa serve... la gera incocalia;
Pisselo in leto? — povareto, el sua:
Rompelo la spechiera? — vita mia,
Varda, per carità, no te far bua.
Diselo un'insolenza, una busia?
La ghe dà un baso, e po un graspeto d'ua.
Dalo un pugno sul muso al sior maestro?
— Che bufoncelo, che maton, che estro!
3In soma, per paura ch'el se amala,
No la vol che nissun ghe contradiga.
El regazzo, che sa che mai nol fala,
El fa tuto a so modo, el se destriga.
Se no i xe pronti a darghe su la bala,
El va in furor, el pesta, el rompe, el ciga;
E de set'ani apena quel frascon
Gera un Atila in erba belo e bon.
4El papà senator vedeva el puto
Da l'amor de la mama sassinà,
Ma nol gaveva cuor de farse bruto
In fazza de la so cara metà.
I parenti i parlava senza fruto,
I amici no gaveva autorità,
Ela po, se anca i tenta iluminarla,
Ga el don de Dio de no ascoltar chi parla.
5Mentre la stava un dì lezendo sola,
O ingropando panele... uh che rumor!
Da la corte, sbregandose la gola,
Quel bardassa cria: mama... Con furor
La buta tuto al diavolo, la svola:
Indovinè perchè mo? un servitor
Ghe negava una cossa fora d'uso,
E lu da rabia se sgrafava el muso.
6— Pezzo d'aseno, forca, dì, perchè
No ghe portistu subito corendo)
Quelo che 'l vol? se in casa no ghe n'è,
Birbante, va a comprar; son mi che spendo,
Ubidissilo in bota. Ma el lachè
Strenze le spale, e risponde ridendo:
Celenza, el pol cigar fin a doman
Che no ghe dago gnente da cristian.
7La torna su furente in convulsion;
So mario gera in camera d'udienza,
La ghe conta l'ardir de quel bricon,
La ghe manda de mal la conferenza,
Tuti va a la fenestra; e dal balcon
Co un pegio da caovechio so celenza
Dise al lachè: — Ubidissi temerario,
O te cazzarò via senza salario. —
8— Ma... za paron, ste cosse, con permesso,
No le se ghe fa bone gnanca in cuna:
El vardava in quel sechio, e per riflesso
L'à visto in acqua a bagolar la luna;
Sala mo cossa che 'l vorave adesso?
Se la parona ghe ne pol dar una,
Mi no per dio! nol vol minga el regazzo
L'acqua, nè 'l sechio, el vol la luna c...!
9Ride tuti, compresa la parona,
A sto spropositazzo da paela:
Ma la ghe pensa su, la ghe ragiona,
El zorno dopo no la par più ela,
Coi speroni e la scuria la scozzona
El so pulier; l'à portà brena e sela...
Oe... l'è stà consegier de santa crose,
L'è andà su come rosso, e morto dose.