El Sacerdote de Giove
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
1No so in che secolo,
E no so dove:
So che pre-Mocolo
L'altar de Giove
Ministro preside
Serviva un dì;
2El gera vedovo,
E co do pute;
Do bone diavole
E gnanca brute;
Ma in quanto a spirito,
Cussì e cussì.
3Far guardia a vergini,
Mistier da cani;
El sa che Giulia
Ga disdot'ani,
Livieta sedese,
Come se fa?
4Però el se rosega
Per maridarle;
Ma el più difìcile
Xe de indotarle,
Che apena i zocoli
L'à civanzà.
5L'era el pontefice
Fra i sacerdoti;
Ma scarse vitime,
Pochi divoti
Povero e squalido
Lassa l'altar.
6Un zorno Giulia
Tonda e robusta
Sunando fragole
Move la susta,
Stuzzega i nomboli
D'un zardinier,
7E sul so esempio
Anca Livieta
Co do mignognole
Fate a moleta
Pizzega el fomite
D'un pignater.
8I tol pre-Mocolo
Uno per banda:
Per muger Giulia
Quel ghe dimanda,
Dimanda Livia
St'altro per lu.
9«Oh! (dise Mocolo)
Da sacerdote,
Le la ga picola,
Fioli, la dote! —
— Oh! i ciga unanimi,
Megio per nu! —
10— Ben, donca totela...
St'altra xe toa.»
Questo e quel zenero
Tol su la soa;
E i core i posteri
A scaturir.
11I studia l'ordine,
L'economia,
I salva el merito
Co l'armonia:
Cussì i vivatola
Senza patir.
12Ma el pare tenero
Per le so tose
Brama de vederle
Anca da spose
Dopo la critica
Risoluzion.
13Gera mo scandalo
Anca in quei zorni
Zirar in tonega,
O in mitra a corni,
Lu el ghe va in mascara
Da pantalon.
14El chiama Giulia
Sola da parte:
«Vien qua mo, coccla,
Vien a sfogarte,
Se qualche radego
Ti ga sul cuor.
15Parlime libera:
Xestu contenta?
Disnistu? cenistu?
Pan o polenta?
Te manca, viscere,
Quel che più ocor? —
16— Papà, co Tofolo
(La ghe risponde)
Vivo in tel zucaro:
Ma ne confonde,
Ne seca i totani
Sto ciel seren.
17Oh se gavessimo
Ogni matina
Un scravazzotolo
De piovesina,
Che i nostri brocoli
Sgionfasse ben! —
18— Ho inteso: seguita:
E per el resto? —
— Papà, credemelo,
Bastaria questo! —
— Fia mia, consolite,
Te assistarò.
19Doman mi celebro
L'aniversario
De Giove Olimpico.
No go salario:
De quatro nuvole
Lo pregarò.
20Finia la visita,
Prima de sera
El va, e l'interoga
La pignatera.
«Voi saver, Livia,
Come la va. —
21— Oh! poche chiacole,
Papà mio caro,
Mio mario Trapano
Xe un omo raro:
No gh'è 'l so simile
In sta cità;
22Da terza a vesparo
Mai nol sta in ozio:
El ga del credito:
E che negozio!
Semo do tortore,
Mi e lu, lu e mi;
23Solo voressimo,
Co le xe fate,
Che 'l sol benefico
Su le pignate,
Pronto a sugamele
Fusse ogni dì.
24Se Giove Olimpico...
Papa, preghelo,
Bechè sta grazia
Per nu dal cielo,
Da lu el pontefice
Ga quel che 'l vol. -
25— El ga la buscara,
Livieta bela!
Va prima e giustite
Co to sorela:
Pignate o brocoli,
O piova o sol.»