El balo de l'impianton
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← No farte pregar | Edission e fonte ▼ | Se fusse un rossignol → |
Quel dì che su le Zàtare
Te go parlà de amor...
Me gera messo in cìcara
E pò gaveva un fior
Pontà sora de l'àsola,
Al posto del boton,
E me sluseva el pômolo
In man del mio baston!
Ti, ti m'à tolto subito
Per un American
Pien de bon tempo e rendite
Che ghe assicura el pan!
Disendome: ― Simpatico! ―
Ti m'à zurà el to ben...
E, squasi, squasi, in publico
Ti me strenzevi al sen!..
Adesso, ti, savendome
Un povaro meschin
Che çerca de cavàrsela...
Façendo el moscardin...,
Ti vien a dirme: Piavolo,
Lasagna, pantalon...
E ti vol darme el perfido
Balo de l'impianton!
Marcia!... Va via!... Vergògnite!..
Çerchite un altro amor...
Al primo che te capita
Dònighe pur el cuor…..,
Ma, varda ben..., ricòrdite!...
Tra i pìe no me vegnir
Se caso mai per scrupolo
Ti te vorrà pentir...
Perchè sarò teribile...
E forse più crudel
De quel che ti me giudichi
Ti, che ti xe infedel!