El biglieto
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La puerpera | Edission e fonte ▼ | L'ignorante → |
Sempre ghe ne ze stà,
Ma per fatalità
Adesso più che mai
Se trova sparpagnai
5Per tuti i siti
E lontani e vicini
Ignoranti storditi
E libertini,
Che tuto el santo zorno
10I va zirando atorno
Inoperosi,
E se crede permesso
Tegnir certi discorsi licenziosi
Segnatamente a dano del bel sesso.
15Una signora zovene, graziosa,
Bela, colta, galante,
Alegra estremamente e spiritosa,
Ma co un naso piutosto esuberante,
La vien, no se sà come,
20A rilevar
Ch'uno, del qual el nome
No vogio palesar,
Co massima impudenza
In più de qualche sito
25De vari a la presenza
Sora del conto soo l'aveva dito:
— L'è una bela creatura,
E su la boca ghe darave un baso,
Ma me fasso paura
30Del so naso. —
Senz'aversene a mal
Quela signora
Per sbufonar sto tal
Ghe scrive alora
35In aria de secreto
El seguente biglieto:
— Se per fortuna mia
Posso ispirarghe qualche simpatia,
El mio difeto no ghe fassa caso,
40Che per ela go un muso senza naso.
Per aver qualche costruto
Ghe voria de ste signore
Dapertuto,
E a tute l'ore.