El canto infernal
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Inverno | Edission e fonte ▼ | La Quarela → |
I dise i preti che chi va a l'inferno
In mezo al fogo no i sta tanto ben;
I starà mal de istà, ma no d'inverno
Quando la biancolina zozo vien;
E i çitadini tuti intabarai,
Batendo forte i tachi per le Ca'e
I tosse, e i spùa che i par tanti ospeai,
Col naso rosso e le recie ingiassae.
E po', a l'istà, de giugno, lugio e agosto,
Quando che un caldo malegnaso fa,
Ghe sarà anca a l'inferno in qualche posto
Quei che vende aqua fresca col mistrà...
Ghe sarà anca la zo le Canalete
Per far un bagno, e per nuàr; e po':
Stige, Cocito, Flegentonte e Lete,
No i xe fiumi più grandi anca del Po?...
Almanco stando al dito dei poeti,
Se no i xe caboloni patentai
Come quei neri che i ghe dise preti,
Che vende candelete per farai...
E ghe sarà anca qualche bela tosa
Che quando che i danai gavarà sè,
La ghe darà 'na bira, o 'na gasosa,
'Na marena col giasso, o 'n bon cafè...
A sentir predicar quel don Gregorio
Sora l'inferno e sul pecà mortal,
El me farave andar al... purgatorio
Senza tôr l'ogio, la gialapa, o el sal...
Oh, bisogna sentirlo!... El par fra Diavolo
Quando el ghe dise al popolo zucon:
«Tremaaate!...» E zo dal pulpito sto piavolo
El gà fato 'na volta un tombolon;
E 'l se gà roto brassi, testa e naso,
El xe sta squasi in punto de morir,
Ma nol se gà gnancora persuaso
Che l'inferno in sta vita xe sofrir
La sè, la fame, el rafredor, la scabia,
El caldo, el fredo, i dazi, l'esator,
Le campane, le femene, la rabia,
La gelosia, el bisogno, e... ogni dolor;
Senza contar le càbole, le spie,
Le prediche de qualche reverendo
(Molto poco); e po' çerte poesie,
(Massima in venezian), e via disendo...
Per purgatorio, dopo el sal ingrese,
Ghe xe anca l'ospeal, e la preson,
E l'afito de casa, e tante spese,
E' po la morte... e, servo suo, paron!...
Mi me par impossibile che Dio
Nol gabia nè giudizio, nè pietà,
Che dopo quelo che se gà sofrio
De quà, el ne fazza anca patir de là!...
El paradiso, cari, de sto Mondo,
Xe far l'amor, dormir e ben magnar,
Vèdarghe sempre ai goti pieni el fondo,
Fumarsela de gusto, e... ciacolar!...
Ma anca quà zozo, el sempre goder, stufa;
E qualche doloreto mal nol fa;
Ma in çielo, sempre quela solfa, aùfa!
Co nogia, Gesù mio, l'eternità...
Sempre pan d'oro, e sempre godimenti
Da çena, da marenda e da disnar;
No, el pan d'oro nol xe per i mii denti...
Vogio andar a l'inferno, vogio andar!
Mi credo fermamente che se staga
Molto megio la zo che no dessù,
Dove ghe xe i putei che pissa e caga,
E poco odor se sente de virtù...
Dove ghe xe quei veci tabaconi
Co la giosseta al naso che vien zo,
Mùneghe, preti, vescovi e s'ciavoni...
No, no; mi vogio proprio andar la zò,
Dove che no ghe sia le bigotone
Che mastega rosari, uso bignè;
Ma putele de sesto, bele done,
E zoveni che stupidi no xe.
E inveçe de beghine e basacristi
Dal colo storto, e veci sbalonai,
Liberi pensatori e socialisti
Ghe sarà, e framassoni e liberai.
I preti dise, (i ghe ne dise tante
Che no le ghe starave in Arsenal)
Che a l'inferno, (no indove xe stà Dante),
Se sofre ogni tormento, e se stà mal...
Inveçe i dise (perchè i gà paura),
Che in paradiso ogni piaçer ghe xe;
Ma de andarghe, nissun no gà premura...
E i preferisse star qua zo. E perchè?
Perchè 'na vose che vien su dal peto
La ghe dise che tuto finirà
Quando che morti e fredi sora el leto
Del cuor l'arteria più no batarà...
E se xe vero, (e credo che lo sia),
Che l'anema xe un spirito di-vin...
A finir l'andarà in botilgieria
In rum, in graspa, o in corbinelo fin.
Viva l'inferno! Màlgari; e se in viso
Ti te lassi un baseto caldo dar,
Mi rinego la fede, el paradiso,
E subito me fazzo sbatizar!
E se, Màlgari mia, solo un momento
Ti me lassi dormir sul to bel sen,
Viçin de ti, cussì, moro; e contento,
Vado a l'inferno col sacheto pien...
E po, cocola mia, quando saremo
In mezo al fogo, tuti do tacai,
A la barba de Dio se basaremo
Co i basi de l'amor, longhi, infogai.
Ma le xe tute fiabe, Malgarita;
Godèmose, e in malora la virtù:
Scòlteme mi: Se no godemo in vita,
Co se xe morti no se gode più!...