El ciasson
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← A un esimio capocomico | Edission e fonte ▼ | El teatro giazzera → |
EL CIASSON
Andè a teatro? Gavè visto mai
Quel bulo1 destirà sul caregon
Che sa menar le gambe a dindolon
Sbianchizando i so amici co i stivai?
Che ve tien viva la conversazion
Fra un ciapo de mandrili imborezzai?
Che frua, sbatendo, i guanti sprofumai,
O subia co la ciave de scondon?
Col bastoncin tastandoghe la schena
El ciama tuti quei che ghe xe atorno;
El sprotona,2 el contrasta, el li remena.
El ciassa, el pesta, el ragia3 in mile forme;
Mandarlo al galateo no zova un corno,
E no sentì a cantar che quando el dorme.
- Note