El dolor de denti
|
Edission original: |
Luigi Bampo, Miscellanea o trentacinque cose per trentacinque soldi, Treviso, Francesco Andreola, 1828 |
|
Fonte: |
Indice:Bampo - Miscellanea o trentacinque cose per trentacinque soldi, Treviso, Andreola, 1828.pdf |
| ← Avviso al Pubblico | Edission e fonte ▼ | I buoni matrimonii → |
Un contadin (un Marco Paparela)
Entra un zorno in botega da un spizier,
E 'l ghe dise: Vedeu, sior, sta massela?
Questa xe una frussion; feme el piaser,
Deghe un'ochiada, e po sapieme dir
Cossa che go da metar per guarir.
Sior Silvestro paron dela botega,
Che per burlete s'avea fato un nome,
Fa sentar el vilan su na carega,
E l vol saver l'età, la patria, el nome,
Disendoghe che senza ste nozion
No se podea otener la guarigion.
St'altro la beve, e ad onta del dolor
El ghe conta che il ga trentaset'ani,
Che Nadal el se chiama, che a san Fior
L'è nato, che 'l ga in casa cinque cani,
Un'amia vechia, el pare infermo, un fio...
E ogni tanto el se ferma, e 'l ziga oh dio!
Finia sta dolorosa narazion,
Sior Silvestro se mete i ochiai sul naso,
El varda, el tasta, e dopo in grave ton:
No l'è facenda da farghene caso,
L'esclama; sul me onor ve garantisso,
Se de mi ve fidè, mi ve guarisso.
El tira fora un toco de scarlato
E 'l lo impastrochia ben de trementina,
E avertindo el marzoco, che in quel ato
Nol staga a verzar boca, el ghe avicina
El boleton ala ganassa, el fraca,
E in t'un momento el boleton se taca. —
Cossa v’ogio da dar? — Gnente, fio mio,
Me pagarè, (se me vorè pagar)
Co starè ben; intanto andè con dio,
Ma recordeve ben, no stè a parlar,
In tel empiastro no metė le man,
E in quatro zorni vu se belo e san. —
El va via, ma no passa un quarto d'ora
Che 'l se sente un brusor, un tiramento...
Cazza! credo anca mi; per so malora
Un grumo de cavei xe restà drento
Tra el ceroto e la pele, un altro estro
De quela bona lana de Silvestro.
No basta;܂una dozena de putei
Chè à visto el truco, se ghe cala adrio;
Chi lo spenze, chi vischia, e chi i cavei
Ghe tira e 'l patacon: negro e sbasio
Lu torna in speziaria dal sior dotor
Convulso dala rabia e dal dolor.
E za sarave nato un criminal
Se sior Silvestro, omo prudente esperto,
No avesse doparà el medicinal
Che xe per tuti i guai remedio certo;
El ghe dona un ducato, Nadal tase,
E tuto va a fenir in santa pase.