El dubio
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Mi, co te vedo, sento
Un certo no so che,
E digo che nol sento;
4E digo che nol gh'è.
Mi, se me inchiava i denti
Quando te voi parlar,
E digo, i xe acidenti;
8Digo che l'è 'l mio far.
Me cocola una bela,
E in vece penso a ti,
E digo che xe quela
12Un'incostanza in mi.
No visitarte zuro,
E so ogni sera qua,
E credo, e son sicuro,
16Che l'uso m'à portà.
Voi disgustarte, e sento
Proprio che no son bon;
Ma digo: no lo tento
20Perchè no go rason.
Me meto anca in borezzo,
E po so imusonà,
Ma digo: l'è un matezzo,
24Sempre cussì son sta.
Digo ste cosse, è vero,
E pur no stago ben,
E se ò da dir sincero
28Go de l'afano in sen.
Cossa che sia sto impianto
Voria saver da ti,
Essendo che da tanto
32No so capace mi;
Vorave po... eco el caso...
No posso andar più in là,
Tremo, barboto, taso...
36Saravio inamorà?