El fredoloso
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← El petegolon | Edission e fonte ▼ | El sparagnin → |
EL FREDOLOSO
Olà, Genaro, no ve vergognè
De star fra i galantomeni a gratar
Le buganze, a secarli col menar
Le gambe zinzolando el canapè?
Tuta la santa sera vu no fe
Che missiarve, coverzerve e supiar:
A l'infelice che ve sta a vardar,
I grizzoli nei ossi ghe metè.
Insina che ve dura quel tremazzo,
No steve più ficar tra le persone:
Che no i ve toga per un pesse in giazzo;
E co tociè la man ne la pilela,1
Invece de pregar Cristi e Madone,
Deve al santo che porta la graela!2
- Note