El giudizio de Paride
|
Edission original: |
Umberto Foà, Nuove rime veneziane di guerra e di pace, Firenze, Libreria Internazionale, 1917 |
|
Fonte: |
| ← A Valerio Catullo Veronese | Edission e fonte ▼ | Le tose al balcon → |
Vòi cantar de tre sorele
che la Grecia m'à mandà,
sora el mar, soto le stele,
4proprio al colmo de l'istà.
Una xe un fiantin grasseta,
ma la ride de gran cuor,
la xe franca, verta, scieta
8sempre alegra e in bon umor.
Ahi! La magia ghe xe streta
sora al corpo ben formà,
per fumàr 'na sigareta
12la fa... Cossa? No se sa.
La xe nata, un fìà indolente,
per qualche harem de Bey,
gh'è un riflèsso d'Orïente
16nei vostri oci, Elena, sì.
St'altre do xe do putele
che bisogna assae studiar,
no le xe çerto de quele
20che no sa gnente ispirar.
Alexandra, dreta in vita,
co dei oci de gazela,
ben formada, svelta, drita
24veramente xe una stela.
I cavèi de un çerto biondo
che se infiama solo el sol,
un viseto furbo e tondo
28che pol far quelo che el vol.
La xe un fìà romanticheta
e la pensa assàe al passà,
e la dixe, a darghe reta,
32che mai la se sposarà.
La lo dixe e mi, galante,
no vòi çerto contradir,
ma me par che quel sembiante
36l'incontrario vogia dir.
La xe fiera, forte, onesta,
dignitosa e un fià sprezzante,
dentro quela bela testa
40de malizie ghe n'è tante.
Mi scometo, e so deciso
de lassàr la testa in pegno,
co quei oci e co quel viso,
44no la xe fata de legno,
che un bel zorno sentiremo
che la s'abia inamorà.
A pensarghe solo tremo,
48ma voràve esser quel là!
La Luçia xe inveçe mora
co dei oci de carbon,
co un corpo che inamora
52e un soriso tanto bon.
La ga çerto del talento,
dei prinçipî, del pudor,
pur, de dirvelo no stento,
56l'è più nata per l'amor.
Se vardè nei oci fondi,
fondi, fondi come el mar
che a nissuni xe secondi
60vedarè l'amor tremàr.
Un difeto, picoleto,
veramente la lo ga:
la so zogia e el so dileto
64xe brilàr in società.
No la sa peraltro ancora
quanto marzo gh'è in quel mondo,
che xe tanto belo fora,
68che xe tanto bruto in fondo.
Ma sto picolo difeto
mi go belo e perdonà,
el xe fio del so museto
72el xe fio de la so età.
Le ve piase ste sorele
diferenti e tute bele?
Agiutème per pietà
76perchè mi son imbrogià.
Zudicar non savarìa
come Paride co un pomo
Son più furbo. Avendo el pomo,
80tuto me lo magnarìa!