EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
El Matrimonio
Stramboto per le nozze Bellati - De Mezzan
XIX secolo
Edission e fonte ▼
[p. 356 modifica]
EL MATRIMONIO


STRAMBOTO

PER LE NOZZE

BELLATI-DE MEZZAN.


Quel nonsochè de vogia de mario,
     Che drento, done mie, sentì de aver,
     La tendenza de unirse a una mugier,
     Ala qual no volendo andemo drio,
     5No gh'è dubio, xe quela propension,
     Che natura ha credudo necessaria
     Perchè no vaga cole gambe in aria
     El so sistema de propagazion.
Dela esistenza de sta gran tendenza
     10Sentimo in nu la piena conoscenza.
     Quelo che ancora po par che se ignora
     Xe 'l modo che natura ha doparà
     Co sta tal propension la n'à ispirà;
     Xe l'aparente material rason,
     15Che ne fa aver bisogno de sta union.
Dunque modo e rason, come le so,
     Se degnè d'ascoltarme, ve dirò:
     E per darve un'idea, che sia comun,
     E no ghe sia nissun,
     20Che no ghe ariva, se no ancuo, diman,
     Vardè el pistor col ve fa suso el pan.
El tagia la pasta
     Infin che la basta,
     El doma, el la mena
     25A forza de schena:
     Do tochi el ve forma,
     Un toco per man:
     Ghe dona la forma,
     Che vol quel tal pan:
     30E co una strucada
     A sti do pezzeti
     Ghe da una tacada,
     E vien i paneti.
Cussì la natura,

[p. 357 modifica]

     35Divisa la pasta,
     N'à fato a do a do:
     N'à dà la figura,
     La forma, e po basta:
     Nè mi ve dirò
     40Qual sia la rason
     Che l'à stralassà
     De far quela union,
     Che al pan i ghe fa.
L'è un fato per altro,
     45Nè gh'è chi se opona,
     Che semo omo e dona
     Formadi un per l'altro,
     E ne fa credenza
     La nostra tendenza.
50Chi se imbate in quel pezzo de pasta,
     Che natura gavea preparà
     Per unirlo ala propria metà,
     Che 'l se sposa, che gnente el contrasta.
     Chi a l'incontro quel pezzo no trova,
     55Guai, se mai de sposarse el se prova:
     L'è un bocon che nol pol digerir,
     Nè gh'è medico per farlo guarir.
Tuto el studio che avemo da far,
     Xè quel pezzo de pasta a trovar.
     60Pur gh'è molti, che gnanca ghe abada;
     Qualchedun crede averla trovada,
     Inganà da una turba de vizi,
     Che sta in mascara atorno i novizi,
     Perchè el tempo nemigo a natura,
     65Distrutor de qualunque fatura,
     Ghe li manda per sola rason,
     Che i disturba la generazion.
Qualchedun se 'l ga el pezzo incontrà,
     Che per lu gera sta destinà,
     70O ghe manca el favor de fortuna,
     O l'è nato in mal punto de luna,
     E se mete de mezzo i parenti,
     Che vol far per l'età da prudenti,
     E per forza ghe tol da le man
     75Quela pasta, che gera el so pan.
     Cussì el mondo va sempre al roverso:
     A mal fato se vede el ben perso.
Nela bela età del'oro,
     Quando in tera stava i numi
     80A insegnarne i so costumi,
     E la fede e la inocenza
     Le faceva per prudenza

     Sentinela dele spose,
     Le caene del'imene
     85Gera rose,
     Perchè i aveva serà via
     In tel vaso de Pandora
     La indiferenza cola gelosia,
     E no se conosceva i vizi ancora.
90O se incontrava alora
     El so pezzo de pasta facilmente,
     O se nol gera quelo,
     Coregeva el modelo
     La virtù, che per tuto era presente.
95Ma in adesso che 'l vaso è roversà,
     Virtù imisantropia s'à ritirà,
     Le caene de rose s'à fruà,
     Tuti i fiori gh'è cascà,
     Tanto che l'è giusto vogie:
     100No gh'è più che spini e fogie,
     Xe el capricio e l'interesse,
     Che s'à messo le braghesse,
     E comanda in tuti i toni
     Sul destin dei matrimoni.
105I pastori se acompagna
     Per aver le pastorele,
     Che a magnar per la campagna
     Ghe conduga le so agnele.
Chi laora ne la tera
     110Una sposa va cercando
     Per aver chi fa de bando
     Co più cuor de la massera:
E sta zente gnente bada
     Se a trovar la pasta i fala;
     115I se sposa s'una ochiada:
     Bona gamba e bela spala.
     Ma in campagna, passa via,
     No gh'è tanta carestia
     Se ghen conta l'un per cento,
     120Che se sposa, e sia contento.
Inocenza, che tradia
     S'à trovà ne le cità,
     Sul momento xe partia,
     La s'à in vila ritirà.
     125Qualche volta a quei che passa
     La ghe fa la carità,
     Un ricordo la ghe lassa
     Per trovar la so metà.
     Ma in cità se cercarè
     130Un per mile trovarè

[p. 358 modifica]

Se principia un sposalizio
     A proporve per contrato,
     De la sposa per servizio
     Se ve mostra un bel ritrato.
135Se 'l pitor gnanca l'à vista,
     Purchè un poco el la descriva
     Sul ritrato se l'acquista,
     La xe ela proprio viva.
Za se sa, prima domanda,
     140Se contrata su la roba,
     Se la fusse grossa e granda
     Questa drezza anca la goba,
L'è un portento de talento,
     La xe bela come 'l sol,
     145Se l'è un aseno d'arzento;
     Se l'è d'oro, chi ghe pol?
     Del mario no se discore,
     Sia pur orbo, gobo, zoto,
     Basta aver cucà el merloto,
     150Tute in brazzo le ghe core.
El contrato za xe fato,
     Vien el zorno dele nozze
     Scufie, abiti, e carozze,
     Ogni artista xe impiegà.
155Un mier de soneti
     Ve stampa i poeti,
     Un numero grando
     De auguri, de lodi,
     Se va prodigando
     160Sui vostri nevodi:
     Il lustro degli avi...
     Che xe da lustrar.
     Se i fusse anca travi
     Avran da emular.
165Alquanti scroconi
     In mezzo ai boconi
     Ve sbragia un eviva,
     Che al cuor no ghe ariva.
     Svodae le botiglie
     170Se fa el so baleto:
     Se canta, se strepita,
     I sposi va in leto.
Che i se leva mo aspetemo,
     E chi sa... che no i vedemo
     175Un pocheto imusonai...
     Che i xe mal accompagnai
     Ghe par forsi de capir...
     Ma no se pol dir...

     In pressa... cussì...
     180Ghe vol do tre dì.
I capita... i passa...
     Pur tropo xe vero:
     I ochiai xe calai,
     Vedè senza vero.
     185I vizi... xe massa,
     Novizi... bondì.
No xe più permesso
     De far el barato,
     El giogo xe messo,
     190El falo xe fato.
Voleu de le piere
     O de le noghere
     Le machie trovar?
     Bisogna fregar.
     195Volen veder chiara
     Dei sposi la tara?
     Bisogna sposar.
La toca de quelo
     Che compra un cavalo:
     200L'è bravo, l'è belo,
     Nol mete pie in falo:
     El ga sentimento,
     El va come el vento,
     E co l'è comprà
     205El par baratà.
Ma no xe po minga esenti
     Da sti tardi pentimenti
     Gnanca certi matrimoni,
     Che ipso facto ve par boni,
     210Perchè d'altro no i xe nati
     Che da genio, che da amor,
     E diressi che li à fati
     Col compasso el tornidor,
     Se no xe proprio incontrada
     215La pasta che natura ha preparada:
     Quela rata anticipata
     De prezioso sentimento
     Fa svanir in t'un mumento
     Tute el ben che avè sperà.
     220Co sè drento
     No trovè più novità,
     Come i altri vedè chiaro,
     Magnà el dolce, vien l'amaro,
     E bondì felicità.
225Oh! ale curte: fin che 'l vizio
     Xe 'l tiran plenipotente

[p. 359 modifica]

     De la zente,
     Matrimonio è un precipizio.
     Più che l'omo se avicina
     230A una dona,
     Sia pur bona,
     Sia pur bela,
     Ma no quela,
     Che natura ghe destina,
     235Xe l'union matrimonial
     Un delirio universal.
Un tomo — xe l'omo,
     Nol ga più giudizio:
     La dona è un'union
     240De puro caprizio,
     Che va proprio al paragon
     De un orologio de ripetizion.
Ogni poco che se fraca
     Sula cassa, o in te la susta,
     245El se maca, el se desgiusta:
     El va ben tre zorni al'ano,
     Ogni tanto el ga un malano,
     E se mai per acidente
     El xe bon, nol val più gnente
     250Se 'l va in man de un insolente.
Ma za no gh'e dubio:
     Mugier e marii,
     Che xe mal unii,
     Mai pace no i ga.
255Se i xe zovenati
     I fa in bota i mati,
     Se 'l mato xe un solo
     Madam zalusì
     La capita a svolo,
     260E pase... bondì.
Xei tuti do vechi?
     I ga el so da far
     Cercando sui spechi
     Rason de criar.
265Xei forsi un per sorte?
    Xe megio la morte.
E po ghe xe 'l mal
    Che a tuti preval.
Ghe xe quelo che ve spende
     270Tuto in zoghi, o a le ostarie,
     Chi xe scioco, chi pretende,
     Chi bastona e fa pazzie.
Gh'è 'l mario che mal contento,
     El ve tien come in convento;

     275Gh'è l'avaro, che ve lassa
     Andar nua, che tuto è massa.
     Gh'è 'l santon, che fa crepar,
     El minchion fa vergognar.
     Gh'è 'l superbo, l'arogante;
     280Gh'è la dona petulante,
     Che nè a tavola, nè in leto,
     La ve lassa mai star quieto.
     Se ghe xe cugnae, madone,
     Sentì sempre l'eleissone;
     285Ghe xe quela che no porta
     Che vestiario oltramontan,
     Nè va fora de la porta
     Senza scarpe de Milan:
     Ghe xe quela che se gloria
     290De la dote per la boria,
     E al mario se 'l parla un poco:
     Tasè là, caro pitoco.
     Come dise a l'incontrario,
     Chi xe rico ale bazote,
     295Se le vol qualche vestiario;
     Andè là, magnè la dote.
     Guai l'aver mugier sapiente,
     La scombussola la casa,
     El mario no conta gnente,
     300La fa ela, e bia che 'l tasa.
     Guai l'averla incocalia,
     No l'averze boca mai
     Senza dir 'na sciocheria.
Tuti insoma ga la soa,
     305Nè rimedio a sti malani
     Trovarè gnanca in cent'ani,
     Se quel pezzo de pasta no incontrè
     Preparada perchè ve acompagnè.
Ma credeu che questa sola
     310Sia la serie de' quei guai,
     Che ga i mal acompagnai?
     Mentirave per la gola,
     Gnanca un quinto no v'ò dito...
     Se andarave al'infinito...
315Ma... me par che i salta fora
     Che i me diga: ala malora,
     La deu dunque disparada?
     Mai più nozze a chi ve bada.
Eh pian, done, siè tranquile,
     320Che la union de ste metà
     Tante volte s'à incontrà,
     Ve l'ò dito, l'una in mile.

[p. 360 modifica]

     De le nozze el sacro nodo
     Mi no intendo disprezzar:
     325Che no aprovo, che no lodo,
     Xe 'l volersene abusar.
Seu po mossi a far sta union,
     No da fini secondari,
     Ma per tender ala pura
     330Intenzion - de la natura,
     Per dar vita ai vostri pari,
     E trovar quela metà,
     Che per vu xe sta formà?
Ve lo zuro, no gh'è pregio,
     335Che del talamo sia megio:
     L'è un'union de paradiso
     Che inocenza à incoronà:
     Che quel ben, che xe diviso,
     Ve presenta radopià.
     340Anzi tuti - pute e putì,
     Seguitè co divozion
     Quel'inata propension.
     No se zoghelo anca al loto?
     Provè pur, che ve lo adoto,
     345Provè pur se qualcheduno
     Fra quei mile trova l'uno.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_matrimonio&oldid=49093"