El mio ritrato
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
1Ti me dimandi dunque 'l mio ritrato,
Ma un ritrato de fisico, e moral?...
Co se ghe pensa ben l'è un gran contato,
Voler che un omo diga tal e qual,
Senza usarse un tantin mai d'indulgensa,
Quel che 'l ze, quel che 'l sente, e quel che 'l pensa.
2Col sistema del secolo d'ancuo,
Che per forza dei lumi, e del progresso,
Se calcola indecenza el mostrar nuo
Oltre che 'l corpo, fina el cuor istesso,
E che ze le parole per lo più
Pensieri rebaltai de soto in su,
3Cara Nana, la prova che ti esigi
Tortura quel tantin de vanità...
Ma per ti vada tuto; el to Luvigi
Quelo che xe sta in lu t'à sempre dà...
Me vado dunque a meter a taolin
Col spechio in fassa, e 'l confessor vicin.
4Altoto de statura, un fià sparmeto,
Co un viso largo, e ciera languissan
Cavei biondi, ubidienti al peteneto,
Spartii come che vol la renessan,
E che vien zo con gran disinvoltura
A scender de le rechie la misura,
5Fronte largo e spazioso, ochi celesti
Che per veder no dopera l'ochial,
Naso che cala un gran... come! ti resti?
Se ti vedessi, Nana, el capital,
Che me va de tabaco ogni zornada
Un quarto, e forsi più, de la mia intrada.
6Boca ordinaria co trentadò denti;
Tuti trentado boni e senza neo,
Che odia a certe ore i complimenti,
E mastegaria fero a scotadeo...
Ma una boca per altro, no temer,
Che sa far anca in resto el so dover.
7Del color de le cegie, e dei cavei
Me lasso quatro peli sul barbuzzo,
Qualcun la voria moda da putei...
Ma mi, che mai per mode m'ingaluzzo,
La tegno, se ti vol che te la diga,
Per risparmiar saon, tempo, e fadiga.
8Questa qua ze in complesso la mia testa,
Tacada a un corpo che no ga difeto;
Come 'l dì da laorar vesto la festa,
E cerco sempre, e in tuto, d'esser neto;
Ventiset'ani ò terminà sto magio,
E godo una salute che fa agio.
9Ma, per passar dal fisico al moral,
Confesso, un poco intrigadin me trovo...
Gh'è anca in questo el so ben, ghe ze 'l so mal;
Ma el pelo no vardar tanto nel vovo;
Prima de giudicar pondera, e pesa,
E confronta l'introito co la spesa.
10Se pol paragonar l'omo a un batelo,
Che se trova in borasca in alto mar;
Remi, vele, timon ze 'l so cervelo,
E 'l cuor ze 'l mariner che à da guidar,
I scogi le passion, che 'l trova in lu,
El mar la vita, e 'l porto la virtù.
11Natura dunque, a dir la verità,
Per quelo che ze cuor m' a favorio:
Vedo che assae de pezo se ne dà,
Se, come se sol dir, me volto indrio.
Ma... che intorbia le aque..., cara Nana.
Gh'è del guasto pur tropo, e l'è in altana.
12Se, per esempio, del passà parlemo:
Co un cervelo de ancuo più assae lisier,
Per ogni novità portà a l'estremo,
Cambiava ogni momento de pensier,
E come le farfale ai fiori in mezo,
So anda spesso anca mi de mal in pezo.
13El bigliardo, le carte, le burele,
El nuar, el vogar in bateleto,
Le lengue tute, mare, fie, sorele,
El balar la manfrina, el minueto,
El disegno, la scherma, e la poesia
M'à a vicenda scaldà la fantasia.
14Ma quelo che m'à fato andar in oca,
E più de tuto m'à voltà el cervelo,
Xe sta el canto... e in adesso po me toca...
Proprio de suto no ghe n'ò più pelo!...
Ma!... l'è fata oramai... Nana che testa!...
Olà!... dirò d'aver provà anca questa.
15No gh' è disgusto, nè divertimento,
Che o poco o assae no l'abia za provà.
Arti e scienze? sicuro in più de cento
Tre dì m'ò messo, e 'l quarto ò stralassà,
Insoma bon, cativo, belo e bruto,
Tuto m'à piasso, e m'ò stufà de tuto.
16In sta maniera ò conossudo in pratica
Che l'omo xe a sto mondo un miserabile,
E che per quanto el fassa no 'l ga tatica
De deventar felice in pianta stabile;
Sichè m'ò dito: no gh'è più problema,
Xe arivà el tempo de cambiar sistema.
17Co vedo infati cossa che so adesso
E cossa che son sta nei tempi andai,
No me par gnanca d'esser quelo istesso;
Tendenze, gusti, metodi cambiai;
De l'ilusion me ze cascà el parechio,
E sento in tante cosse d'esser vechio.
18Go ancora forsi un qualche difetin,
Son stravagante ancora el mio bisogno,
Ancuo go malumor, doman morbin,
De farme rico ancora me la sogno,
Ma resto co me svegio, e grazia granda!
Candioto più de quel che Dio comanda.
19Del resto so un ometo che fa vogia,
So quelo che se dise un marzapan,
Bandisse in compagnia pensieri e nogia
In quantum possum fasso el cortesan;
E co le done po?... te l'assicuro,
Alta tegno la testa, e bato duro.
20Eco dunque dipinti a la carlona
Vizi, difeti, meriti, e virtù...
Col mio penelo solito a la bona
T'ò mostrà tuto, e no so far de più...
No ti ghe trovi drento un certo sal?
Lassa el ritrato, e tol l'original.