El mondo a la roversa
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← El difeto de le done | Edission e fonte ▼ | El monte de pietà → |
Sior Batista Rosegoto
'na quaderna ciapa 'l loto,
e lu, pronto come 'l vento,
se la moca.
De una pasqua più contento,
el ariva in un momento
tor el treno più direto
per la Russia;
e, trovandose soleto,
lu voleva in quel viageto
coi so bezzi guadagnai,
divertirse.
Gera un fredo che gelai
come tanti bacalai
che restava per la strada
de quel sito.
Fin la testa impelizzada
Rosegoto preparada
se gaveva per prudenza
fin da prima;
e, aquistando in conseguenza
de un gran orso l'aparenza,
lu façeva fin paura
a la zente.
Un cagnasso de statura
çerto fora de misura
se presenta a l'improviso
drito in pie.
Sior Batista, rosso in viso,
me lo squadra co un soriso
e po 'l tenta, pian pianelo,
per difesa
tor un sasso, e po co quelo
de la bestia far flagelo
e riussir in quela guera
vinçitor.
Ma dal fredo el sasso gera
ingelà su quela tera,
ch'el pareva tanto forte
là inciodà
Sior Batista più la morte
se aspetava che sta sorte,
e, no dando al can più reta,
ga esclamà:
« — Ma che zente maledeta
» xela questa?... e de che peta!...
» de ligar invece i cani,
» liga i sassi!
» Al roverso de i cristiani
» xe qua i russi!.... de sti ani! — »
Ste parole da distrato
ga el so bon significato.