El montanar pacifico

by Berto Barbarani

3 El montanar pacifico I due canzonieri I due canzonieri/Libro V - Le adesine Le ròndene La Nina che ride e la Nina che pianse Berto Barbarani 1911 XX Poesie veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro V - Le adesine

El montanar pacifico

1911

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  Le ròndene

Edission e fonte ▼

La Nina che ride e la Nina che pianse  →

EL MONTANAR PACIFICO.

I.

     Lu, el vien fora dal leto a la matina,
quando par l'aria fresca de verdura
sbalsa le cante¹ de la paesanina,
che conduse le bestie a la pastura;

     e ride i monti da la gresta fina,
con grembiale de boschi a la sentura...
Ma ste belesse, lu, no el le indovina,
parchè ai so oci no le fa figura;

     ma el se cava la sè² par le sorgive,
che vien fora spiumando da le grote
dove la gente crede sconto el lovo,³

e se el pensa rosarie, no el le scrive,
ma el lavora fin tanto che vien note,
come el vangasse drento a un mondo novo...

II.

     E sora note, quando se inargenta
la luna in çiel tra grumoli⁴ de lana,
che el più vecio pastor che se spaventa
promete un temporal fra setimana,

     e la vilana mete via la brenta,
e el campanar se taca a la campana,
e intorno ai fumi de 'na gran polenta
i putei⁵ se parecia a far la nana;⁶

     lu el core in leto e el lassa l'ostaria,
par godèrse la dona al primo sono
tra la piuma e i ninsoi grossi, de lissia;

     e se Dio tien lontan la carestia,
no ghe ne importa d'èssar pare o nono
e a la matina presto el se desmissia.⁷

---

Note

1. le cante: i canti
2. se cava la sè: si disseta
3. el lovo: il lupo.
4. grumoli: bioccoli
5. i putei: i ragazzi
6. a far la nana: da andare a letto
7. el se desmissia: si sveglia.