El palo
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La grazia | Edission e fonte ▼ | La predica → |
Do zoveni insolenti
Trovandose presenti
Nel mumento
Che un frate capucin
5Su la porta pusà del so convento,
Vardava un contadin,
Che gera drio a impiantar
De là del fosso,
No so percossa far,
10Un palo longo e grosso
Imensamente;
Fra lori concertai
Del frate i ghe ze andai
Tuti do arente,
15E in ton de cogionelo,
Cavandose 'l capelo,
Ga fato un prostinò
Con cargadura e po
Ga domandà,
20— Lo vedela quel palo che ze là! —
El frate povareto,
Quantunque navegà,
Nol gera entrà in sospeto,
Nol s'aveva pensà,
25Che l'interogazion
Gavesse un fin baron,
E in piena bona fede
Ghe dise che 'l lo vede.
Quei mascalzoni alora,
30Credendo aver da far con un pandolo,
D'acordo i salta fora,
— Con ela me consolo
Per quela gran rason,
La scusa l'espression,
35Che se la lo gavesse dadriovia
No la lo vedaria —
Ofeso e stomegà de sta indecenza
El padre capucin no se confonde,
E co la più decisa indiferenza
40Senza pensarghe suso el ghe risponde:
— Sarà quel che le dise, ma no credo,
Perchè mi le go in culo epur le vedo. —
Le figure barone,
I prepotenti,
45Che insulta le persone
Co parole indecenti,
Merita de trovar chi ghe risponda
In modo che li oltragia e li confonda.