El papagà (Giovanni Battista Bada)

by Giovanni Battista Bada

3 El papagà Giovanni Battista Bada XIX Poesie

Indice:Raccolta di poesie in dialetto veneziano 1845.djvu

Giovanni Battista Bada

El papagà

XIX secolo

Edission original:	Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845
Fonte:	Indice:Raccolta di poesie in dialetto veneziano 1845.djvu

Edission e fonte ▼

EL PAPAGÀ.

Gaveva un papagà
     Una dona comprà,
     E questo ghe servia
     4De distrazion qualche ora e compagnia.
Col tempo gera bon
     La lo tegnia al balcon,
     E ripeter la ghe fava
     8Quele parole che la ghe insegnava.
Un medico passava
     In quelo che insegnava
     Al picolo animal
     12Parole, giusto el solito, sta tal.
Ti è beco, ghe disea
     La dona; e ripetea,
     Ti è beco, el papagà:
     16E 'l medico a sentirlo s'è fermà,
Vedendo ela el dotor
     Fermà, ridea de cuor,
     Pensando che 'l credesse,
     20Che a lu el so papagà, beco disesse.
El medico mo acorto,
     De questo s'è inacorto,
     E co le quiete alora
     24Ga dito francamente a la signora;
Parona, vu ridè,
     Ma no savè 'l perchè
     Beco el me diga; ond'eco
     28A dirve mi perchè 'l me chiama beco;
El tien elo in pensier
     Che vu siè mia muger.
     Co sta so bizzaria
     32L'à tratada el dotor da buzevia.
          Qualche volta è pungente
          Anca el scherzo inocente.