El porco
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
A Mestre un benestante
Un belissimo porco avea arlevà,
Che gera de grandezza esorbitante.
Un certo so vicin, che avea osservà
5Sto famoso animal,
Ga dito un dì a sto tal:
Compare, avè un porcelo
Che xe una maravegia, grasso e belo.
Ma l'altro ga risposto: amigo mio,
10Cossa serve che belo e grasso el sia
Se quando lo avarò distribuio,
La manco parte la sarà la mia?
A mie sorele muneghe
Ghe ne vol una parte, un'altra al medico,
15Un'altra a sior piovan,
Un'altra a mio zerman,
Un'altra a mia cugnada;
E po roba salada
Da dar a questo a quelo.
20Cussichè posso dir: adio porcelo.
Se savesse trovar qualche pretesto
Per scansarme da tuti; oh ve protesto
Che molto volentiera lo faria,
E tuto quanto mi lo magnaria.
25L'amigo ga sogiunto: donca mi
V'insegnarò el secreto; fè cussì;
Via da de qua mandelo,
E a chi domanda: dov'è andà el porcelo?
Diseghe: el me xe stà
30L'altra note robà,
E cussì sarò esente
D'averghe da dar gnente.
Bravo! sior sì, pulito,
(Quelo dal porco à dito)
35Me piase l'invenzion.
E darò a sto ricordo esecuzion.
Ma ne la note drio da la so sente
L'amigo del consulto bravamente
Ghe lo à fato robar,
40E in un paese più lontan mandar.
Co la matina è stada,
I s'à incontrà uno e l'altro su la strada,
E quelo dal porcelo
Ga dito a l'altro: no savè, fradelo,
45Che i m'à robà dasseno el temporal?
Co la boca ridente
Ga l'amigo risposto: tal e qual
Gavè da far aponto co la zente.
El primo mo zurava e sperzurava
50Che 'l temporal, pur troppo, ghe mancava.
Stralassè de zurar,
Ga replicà el secondo, che l'afar
So anca mi come l'è, che, amigo mio,
Son quel ch'el stratagema à sugerio;
55Peraltro questo è 'l modo
De far parer che vu parlè sul sodo.
Ga tornà da recao quel dal porcelo
A replicar: credelo,
No la xe un'invenzion, la è tropo vera,
60I m'à robà el porcelo geri sera.
E l'altro à replicà medemamente:
Bravo, amigo, ma bravo veramente,
Seguitè pur cussì, che ve protesto
Per vero el caso vegnarà credesto.
65Tornava el primo a protestar zurando,
Ma st'altro alora è corso via ridando.
Pol la fiaba avertir,
«Non ti fidar che non sarai gabbato,»
Ma la pol anca dir:
70«Chi cerca d'ingannar resta ingannato.»