Fia mia, visetto bello inzucarao

by Maffio Venier

3 Fia mia, visetto bello inzucarao (Sonetto LXVIII) Canzoni e sonetti Sonetto LXVII. Vu savé pur se xe do mesi e più Sonetto LXIX. Tra la rabbia, la stizza, e tra 'l martelo Maffio Venier XVI

soneti

Maffio Venier ―  Canzoni e sonetti

Fia mia, visetto bello inzucarao (Sonetto LXVIII)

XVI secolo

Edission original:	Maffio Venier. Canzoni e sonetti. A cura di Attilio Carminati, Manlio Cortelazzo, Tiziana Agostini Nordio Venezia, Corbo e Fiore, 1993
Fonte:	http://www.bibliotecaitaliana.it/testo/bibit001236

←  Sonetto LXVII. Vu savé pur se xe do mesi e più

Edission e fonte ▼

Sonetto LXIX. Tra la rabbia, la stizza, e tra 'l martelo  →

Fia mia, visetto bello inzucarao,
Daspò che ho inteso che vegnì sta sera,
Son vegnù belo, e son muà de ciera,
Che paro proprio un pèrsego mondao.

Sia laudà Amor, daspò che 'l mio mezao,
La mia corte, el mio horto, e la lettiera,
Porà ben dir da seno e da dovera:
So che 'l nostro patron xe venturao.

Vegnì in bon'hora, caro el mio conforto,
E caso mo che me dassé l'impianto,
Doman sentiré a dir: L'amigo è morto.

El desiderio che ho de vu xe tanto,
Che se no vegnissé me fassé torto,
Vu me fassé restar co 'l cuor infranto.

Son de miel tuto quanto,
Daspuò che ho habbùo da niovo che vu, fia,
Ve degné de vegnir a casa mia.