Fra Giocondo
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La predica | Edission e fonte ▼ | L'abitudinario → |
Mia nona che no gera una lasagna
Fra le tante storiele m'à contà,
Che ghe gera in t'un logo de campagna
Circa cent'ani fa
5Un bulo, un zizoloto
De quei che se ghe par
No poder cimentar
Qualche sberloto,
I ga el gusto baron
10De far bordelo
Secondo l'ocasion
De questo e quelo,
Con parole o con pratiche inoneste,
Qualunque sia 'l caratere che 'l veste.
15Un dì che a l'ostaria
Per baracar,
Co vari sul so tagio in compagnia,
El gera drio a magnar
A una tola sentà,
20Dove che l'osto
In tel canton oposto
Gaveva colocà
Un certo fra Giocondo
A l'ordine agregà dei francescani,
25Che missionario aveva zirà el mondo,
Per un corso d'ani,
E gera in conseguenza
Un omo d'esperienza,
Prudente, colto e de virtù esemplar,
30Ma pronto de provar
Quando i lo toca,
Quando l'è provocà,
Come ben che ghe stà
La lengua in boca;
35Se pensa quel ardito
Per mostrar ai coleghi el so talento,
De farghe sul mumento
Sto quesito:
— Ela padre, che credo no inganarme,
40Ghe ne deve saver de teologia,
La prego de voler iluminarme,
Che distanza suponela ghe sia,
Tolendo le misure le più esate
Fra un aseno e fra un frate? —
45Alora fra Giocondo
Vardandolo incantà da capo a fondo
Senz'alterarse gnente
Ghe risponde cussì;
— Da quanto vedo mi
50Presentemente,
Fra l'animal e 'l frate a la parola
La distanza che passa ze sta tola. —
Per la zente
Impertinente,
55Che ghe n'è qualche milion,
Ghe voria de ste lizion.