Giacinto (1817)
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Zorni sereni, e un'aria tepideta
Da grati furianèi solo agitada,
Avea invidà Giacinto a le delizie,
Che semplice Natura in le campagne
5Liberal ne presenta; e gera alora
Che l'ua, color de l'oro, a graspi a graspi
Xe tacada ale vide. Un solitario
Ma grazioso Casin d'una colina
Su la falda piantà, gera el tranquilo
10Logo che l'avea scielto. Da una parte
Nasceva un fiumesèlo, che tra l'erba
E tra i fiori del pra quieto coreva;
Da st'altra, ma in lontan, s'alzava un bosco,
E ghe rideva una pianura imensa
15Proprio in fazza al Casin. Se al far de l'alba
L'averziva el balcon; se su la sera
El vedeva tornar carga de pomi
O d'ua la vilanela, o se in t'un gropo
Atorno una polenta quei vilani
20L'osservava a magnar, in lu el sentiva
Cresserse el cuor. Oh dio! ma no bastava
A scancelar la tropo fissa imagine
De la bela crudel, che a un altro amante,
Dopo l'amor più svisserà, più caro,
25S'aveva abandonà. Piaghe xe quele
Che no sana cussì. Ben pensieroso
Spesso l'andava in solitaria parte
A sfogar el dolor che lo investiva,
E una note fra l'altre, che più bela
30No avea visto quei loghi, in mezzo al bosco
El s'aveva inoltrà. Nel ciel la Luna
Cussì chiara luseva, che d'arzento
Pareva i coli, e le campagne atorno
E l'aria odori e balsami spirava;
35De quele note insoma che ad ogn'altro,
For che a amante tradìo, xe un Paradiso.
Pur su l'erba sentà, fra quele piante,
Cussì disendo, iluderse el tentava:
Erbe odorose e morbide,
40Aria che sventolar
Te piase e sussurar
Tra fogia e fogia;
Ragi che introdusendove
Tramezzo i rami andè,
45E tra l'ombre lassè,
Sto dolce lume;
Oh! qual piacer patetico
Fe' che se svegia in mi!
Come che radolcì
50Del cuor l'afano!
Nè questi xe incantesimi,
Come xe quei d'amor,
Che tra i fiori el dolor
Sconde e le pene.
55Nè per belezza istabile
Sento el piacer in seu
Per sofrir del velen
Dopo le angosse.
Tropo anca mi una perfida,
60Credulo tropo, ò amà,
E go sacrificà
Tut'i mii afeti;
Ma alfin del mio delirio
Trionfando la rason,
65De l'indegna ilusion
Fa che me penta,
E che desmentegandome
De quel ingrato cuor,
Bosco, nel vostro oror
70Trovi la calma.
In un dolce sopor dopo sto sfogo
Quela calma pareva ch'el godesse
Ch'el voleva trovar. Quando una vose
Che ghe passava el cuor, lo svegia; el vede
75Un ogeto confuso che fra i alberi
Gera come butà, che un ragio debole
De luna, che fra i rami trapassava,
Ghe permeteva de scovrirlo apena;
Mestamente cussì l'ose diseva:
80Ombre, me par che st'anema
Trovi nel vostro oror
Pascolo a quel dolor
Che la consuma;
Vu fe' che lusingandone
85Sta vita terminar,
Senta nel mio penar
Qualche conforto.
Qual vose, oh Dio! me lacera
(Giacinto esclama) el cuor?
90Qual novo abitator
Ghe xe in sti orori?
Un Dio che me perseguita,
Un Dio certo infernal
Per colmo d'ogni mal
95Giulia me afazza.
Spetro, che a mi teribile
Più che le furie ti è,
Ch'el più crudel no gh'è,
Torna a l'Inferno;
100Desfantite, destruzite,
Va via, lassime star...
Mi no posso scampar,
No gò più forza...
El pianto, oh Dio! le smanie
105Anca ti fa sentir,
Megera, a incrudelir
El mio tormento?
Perfida, quele lagreme
Xe quele che ò sgorga,
110Da quele vien bagnà
Quel peto indegno!
Sangue crudel, no lagreme,
Sangue l'à da bagnar,
Lu solo à da lavar
115El to delito...
Ma m'insonio? o xe i gemiti
Questi d'uno che mor?...
Tropo debole cuor,
Mente, dov'estu?
120Cessi l'ingano... ahi misero...
Carne giazzada!... oime!...
Giulia istessa la xe,
Giulia che manca...
Torna, no xe implacabile
125Sto cuor, cara revien;
Torna, torna a sto sen,
Tuto perdono.
Ti respiri? Vardandome
So quel che ti vol dir...
130Tasi, no voi sentir
Scuse o perdoni...
Ma pur dime, el più tenero
Amante abandonar
Per cossa? e in brazzo andar
135D'un novo amante?
Amor?... ti è dona, e debole?...
Ti t'à pentio in quel dì...
E per cercarme mi
Ti à trova morte?...
140Tasi, ste scuse, incauta
Rinova el mio furor,
Vardite da un amor
Indispetìo.
Amor? caprizio, perfida
145Dona... no, tigre ti è.
A cercarme ti xe?...
Scampa o te amazzo...
Un stilo? Ah sì ne l'Erebo
Va co le ingrate a star...
150Mazzite pur... No far...
Dame quel stilo.
Sto cuor, Giulia, lo merita...
E la to crudeltà. —
— No ti è ancora placà
155Cuor de masegno?
No te comove i gemiti,
L'orida situazion,
L'ingenua confession
D'una moriente...
160No ti è mai sta colpevole,
Ti à bu propizio el ciel?
Ma dime esser crudel
No xe una colpa?
Scorda, se ti ga un'anima,
165Tiran l'infedeltà,
Per ti la s'à scorda
D' esser virtuosa.
— Mi primo lusingandote
T'ò insegna per amor
170A tradir el to cuor
Mancar de fede.
O Giulia, o Giulia amabile,
Perdona a mi; mio ben
Vien fra sti brazzi, al sen
175Vien che te strenza.
No vedo più, assicurite,
Ch'el mio ben: leva su;
Cara, no vedo più
Che le to lagreme.
180No vedo che quei laveri
Dove che Amor un dì
Zogatolava, e mi
Co lu rideva.
Lassime benchè languidi...
185Mo via no pianzer più,
No regni fra de nu
Che l'alegrezza.
Me vustu ben?... rispondime...
Sì... ma cossa?... infedel?
190O infedel, o fedel
Ancuo ti me ami.
Questo me preme, vissere,
El resto l'ò scordà;
Dame la man, vien qua,
195Vien che te porta.
No ti ga forza? pusite
Donca, al colo la man
Passa, no xe lontan
Dove che andemo.
200Cussì el pietoso amante a lenti passi,
Squasi portando Giulia, che languente
Se andava consolando, a la colina
Dove gera el Casin el l'à condota.
Là el l'à vista a sanar; là l'à savesto
205Che pentia per cercarlo in mezzo al bosco,
Persa la strada, dal dolor, da fame,
E da stanchezza mezza morta, l'ultimo
L'aspetava dei dì. Là in fin Giacinto
El ga visto a tornar le rose in fazza,
210El ciel nei ochi, Amor sui lavri, e in mezzo
Dei più dolci trasporti amante e amata
À passà in quel Casin zorni beati.