Giornale dell'assedio di Costantinopoli 1453/04
|
1856
|
|
Edission original: |
Nicolò Barbaro, Giornale dell'assedio di Costantinopoli 1453, a cura de Enrico Cornet, Vienna, Libreria Tendler & Comp., 1856 |
|
Fonte: |
| ← 2 dicembre 1452 | Edission e fonte ▼ | 14 dicembre 1452 → |
Adì 131 dezembrio fo fatto la union in la giexia de santa Sofia con grandenissima solenitade de chierixie, en etiam ve jera el reverendo gardenal de Rosia, che jera mandà per el papa, etiam ve jera el serenissimo imperador con tuta la sua baronia, e tutto el populo de Costantinopoli, e in quel zorno ve fo de gran pianti in questa zitade, e questa union sì se intende, che i sia unidi come nui franchi, e non aver più sisme in la giexia, et eser tuta una medema leze e una fede, e dir messa nui in le sue giexe, e lor griexi dir messa in le nostre giexie latine.
Adì 13 pur dezembrio fo praticado de retignir le galie grosse de marcavo per conservation de Costantinopoli, e questa pratica fo fatta in la giexia de santa Sofia, e lì ve iera l'imperador, el gardenal de Rosia, el vescovo de Metelin,2 e tuti i Baroni de l'imperador, e tuti marcadanti de le nation, e la più parte del populo de questa zitade, e tuti digando per una voxe: se queste galie de venitiani se partirà de questa tera con queste nave che al prexente se truova in porto, nui de boto semo prexi da Turchi; e in questo raxonamento l'imperador si andò a disnar con tuti li suo baroni, e cusì fexe ognomo, e in questo zorno non fo fatta altra pratica, salvo raxonamenti asai.
- Note a cura de Enrico Cornet (1856)