Giornale dell'assedio di Costantinopoli 1453/22
|
1856
|
|
Edission original: |
Nicolò Barbaro, Giornale dell'assedio di Costantinopoli 1453, a cura de Enrico Cornet, Vienna, Libreria Tendler & Comp., 1856 |
|
Fonte: |
| ← 28 aprile 1453 | Edission e fonte ▼ | 1°-2 maggio 1453 → |
A dì vinti nuove pur de questo mexe de aprile, siando anegado con la fusta misser Jacomo Coco patron de la galia de Trabexonda, e l'acadeva a far uno vizo patron de la galia, e però misser Aluvixe Diedo capetanio de le galie, fexe ser Dolfin Dolfin, fo de ser Domenego, vizo patron de la galia de Trabesonda in luogo de ser Jacomo Coco, che dio li perdoni. El sora scrito ser Dolfin Dolfin, si avea in varda la porta da tera, la qual se chiama porta del palazo, che iera forte, ben vardada da tuti; el dito lasò de vardar la porta, e vene a star in la galia; romaxe a la porta del palazo in suo luogo ser Zuane Loredan de ser Polo. Per el dito mexe de aprile non fo fato altro, nì da mar nì da tera, salvo scaramuze assai e bombarde assai, che i treva in le mure, le qual mai non refinava de trá, zorno e note, e pur d'agnora se butava de le mure de la tera per tera, d'agnora metando la tera in più pericolo, e nui de la zitade fevemo de boni repari de bote, e de fasine, e de tera in ne li luogi che bexognava, per muodo che i iera cussì forti, come i fosse stadi de proprio muro, come i iera da prima, e questo perchè bota de bombarda non i podeva nuoxer per non poder rezever bota. —