Giulieta e Romeo (1905)/Confession de Giulieta
|
Edission original: |
Berto Barbarani, Giulieta e Romeo, Milano, Luigi Ronchi, 1905 |
|
Fonte: |
| ← Note terza | Edission e fonte ▼ | Cavalcata de Romeo → |
Padre Lorenso, no ve posso dir
le lagrime che pianso e no le conto,
parchè iè tante da dover morir...
Romeo Montecio, me scriveva a ponto
de tòrme suso in bona compagnia
ma speta speta, se ghe sente sconto
come una voia de contar busia...
così belo che l’è, mi, gh’ò sospeti
che qualche dona me lo porta via.
Gh’emo scrito, el savì, che i Capeleti
vol darme sposa a un’altra creatura,
par rovinarme ne i nostri progeti,
ma lu el risponde de no aver paura,
che el farà, el vegnarà, ma quando e come..?
Co sto far, sto vegnèr, la me sà dura
Padre! Vu, che g’avì quel çerto nome
de far filtri e magie, con erbe e fiori,
bei da vedèrse e cativi de aròme,
dème un velen, che stòfega i dolori,
se no volì che diga de coparme
parchè el me corpo no vol altri amori
e no vôi n’altra volta maridarme.
Quel che adesso disè, cara putèla,
me fa pensar su ’na combinassion
de çerte erbe de Val Polesela,
che fa miracolosa operassion!
Quando che sponta quela data stela,
bevì presto sta ampola e pò dormì...
quel che sucedarà santa putèla,
gnente paura, che ghe penso mi..
Vu morirè così, ma de una morte
quasi improvisa, che la ingana el cor,
risussitando piassè bela e forte,
come ha fato Gesù nostro Signor; —
risussitando par Romeo, che intanto
qualcheduno dei nostri avisarà
de vegnèrve a tor su dal camposanto,
dove i me frati ve sepelirà,
de vegnèr qua de note co i cavai
bei e bardadi e freschi par partir,
galopando lontan che infina mai,
via da sti loghi fati par morir.
Ma se drento a i misteri de ste ciese,
fra le piere de i morti e ancora caldo,
(che da sta Pasqua no è passà che un mese)
ve catarè col corpo de Tebaldo,
se qualche vermo ve dirà sul viso
dove che va a finir la vanità?...
Padre, mi penso sempre al paradiso
e a i tanti basi che Romeo m’ha dà!
La vostra ampòla mi no la refùdo,
ansi la trovo dòlsa come el miel,
e quando che Romeo l’arà savudo,
come Giulieta gh’è resta fedel,
tanti basi in compenso el ghe darà...
E la storia l’è sta,
che quando manco s’avaria credudo,
ècote pronta la fatalità!...