Grande osservanza in amore
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
LA beltà, la virtù, la cortesìa
Che ò visto, vita mia, nome in vu sola
Me tien picà talmente per la gola
Che ò l'anema in tel sen tuta smarìa.
E perchè me se' al cuor tuta scolpìa,
E più ficà che no xe gropo in tola,
Mi go perso la vose e la parola
Per vu propria e ver'anema mia;
Un potente pensier ze stà el penelo;
Amor el mistro, e sasso fu 'l mio cuor,
E 'l saldo mio dolor duro martelo;
E mi, che ò mo dal Ciel tanto favor,
E che vedo un ritrato cussì belo,
Onoro in la mia Stela el Dio d'Amor.