I do Lioni
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
Su l'arene deserte de l'Africa,
Dove el Sol de la tera fa cenere,
Verso un'arida croda de porfido,
Tormentai da una sè che li sofega,
A vint'ore, nel cuor de l'istà,
6S'à do enormi Lioni incontrà.
Là dal dì ch'è andà in aria Cartagine
No gh'è gnanca più l'ombra d'un albero,
Là no piove, russeli no mormora,
E do sole o tre volte in un secolo,
Fra quei sassi per puro morbin,
12Qualche Naiade à fato pissin.
Ma quel dì, con un tremito insolito
De la croda sconvolte le vissere,
De poc'aqua s'à averto un deposito
E scampando la tenta de sconderse.
Quei Lioni che acorti se n'è,
18Sbalza, svola, a stuarse la sè.
I podeva, se i aveva giudizio,
Rinfrescarse in fraterna l'esofago,
Ma superbia invidiosa li rosega,
E i se varda, e i se brontola burberi
Con un rantego unisono a do:
24Mi voi bever... mi solo, e ti no.
Za le schizze ghe sbufa, ghe zufola,
Va le coe stafilandoghe i nomboli,
La massele i spalanca sanguivore,
E le sgrinfe i desguanta sbreghifere,
I se cufola, i sguinza, i dà su...
30Se sperè separarli, andè vu.
I se aventa, i stramazza, i se zapega,
I se sgrafa, i se struca, i se mastega,
Denti a denti s'incrosa, se stritola,
Fioca i peli, la bava ghe sgiozzola,
D'urli rauchi e stonae da violon
36I concerta un duèto a Pluton.
Quei rugiti de rabia in baritono
Va su in aria, in le grote se furega,
E le fiere, i volatili, i retili,
Spaventai da quel'orida musica,
No se sogna fermarse a vardar,
42E la serpe se torna a intanar.
Nova stizza li ponze, li stuzzega,
Piu feroci i Leoni se lacera;
À durà quela zufa teribile
Più de quela de Achile con Etore,
Perchè Venere, Marte e Netun
48No ga tolto el partio de nissun.
Tanti sforzi ogni forza ghe anichila,
Ghe scomenza le gambe a far giacomo;
I se ferma; dal grugno ai garetoli
Sangue vivo ghe spruzza, ghe spizzola;
Resta in tera, tra bava e suor;
54Denti e sgrinfe, trofei del furor.
Trabalando, sbrissando i se rampega
Da quel'aqua a cercar refrigerio:
Ma che! mentre a la burla dei posteri
Stava i mati strazzandose i didimi,
S'à quel'aqua a so logo incassà...
60El Sol ghe arde el respito... i mor là.