I do orbi
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Xe passà un morbinoso verso sera
Per san Filipo-Giacomo,
E sul ponte ghe gera
Do orbi che cercava la limosina.
5El xe andà arente a quei,
Disendoghe: fradei,
Tolé sto mezzo talaro,
In pase dividevelo,
E recitè el rosario
10Col Deus in adiutorio
Per l'anime del santo purgatorio.
Ga dito l'un e l'altro: Dio ghe 'l merita.
E dite ste orazion i s'è pensai
D' andar a l'osteria, e presto i xe passai
15A quela del Salvadego,
E i s'à fato portar
Da bever e magnar.
I xe vegnui po al ponto,
Che più interessa, de pagar el conto:
20E questo à dito a quelo:
Vu, che avè el mezzo talaro, paghelo:
Ma l'altro alora ga risposto: vu
Paghelo, che sè quelo che l'à bù.
Ga replicà el secondo: mi no posso
25Pagar, quando sè vu quel che l'à scosso.
Mi no go scosso gnente,
Ga tornà a dir el primo francamente.
E st'altro alora à dito: sè un bricon
Che me voria trufar. Vu, se un ladron,
30Ga sogiunto quel'altro, ma no mi.
La va dita cussì,
Ga tornà questo a quelo a replicar,
E a forza de incalzar
Ingiurie sora ingiurie i xe arivai
35Che i se xe bastonai.
Per meterghe de mezzo è corso l'osto,
E infati el gh'è riussio, ma a proprio costo
Che anca a lu gh'è tocae
Oto o diese legnae.
40I orbi à capio dopo
Come quel tal li avea burlai pur tropo,
Onde a l'osto i ga dito: pagaremo
El primo dì che nu se vedaremo,
E l'osto, omo discreto,
45Ga ridesto a sta cossa, e à tirà dreto.
Mi no aprovo quel scherzo,
Che in dano a ridondar vegna del terzo.