I tre Gobi
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Verso el passo de Menai,
Soto un olmo stravacai,
Un cavalo, un manzo, e un aseno
4Stava un dì in conversazion.
Ma parlando de se stessi:
Che alboroni! che cipressi!...
I se esalta! stenta a intenderse
8L'amor proprio e la rason. —
— «Son più forte! — e mi più belo!
— Go più sal! — mi più cervelo!
E i se indora a lodi enfatiche
12Giusto i pregi che no i ga.
«Ti de seda? e mi de ganzo. —
A le curte (dise 'l manzo)
» Seu contenti se ne giudica
16Sti tre gobi, che vien qua?
Spieghi ognun la so pretesa,
Fazza ognun la so difesa,
Sia 'l giudizio inapelabile
20Se d'acordo ghe n'è do. —
— Ben; so dano chi se pente.»
Passa i gobi, i ghe va arente,
E i presenta la so suplica.
24Quei risponde — perchè no?
No i ga veste, nè peruche,
Ma i se senta su tre zuche
Che ghe insinua el so criterio,
28Za capì, de soto in su.
No ghe xe la mezzarola
Che ve scana l'ose in gola;
Ma 'l Cao dise — no preamboli:
32Sior dai corni, toca a vu.
Senza pompa d'oratoria
Conta 'l manzo la so istoria,
Fa l'elogio dei servizi
36Che l'è solito prestar.
Nol ga pari in robustezza,
Nè in costanza, nè in belezza,
El se salva co l'epilogo
40Che l'è bon fin da magnar.
El cavalo con orgoglio
Dise — «amici, io nacqui al soglio;
Vanto i nobili esercizi
44D'un magnanimo destrier;
Vo' di volo per la terra,
Mi cimento nella guerra,
Ed in grembo alla vittoria
48Meco porto il cavalier!»
Pesi enormi, viasi eterni,
Soli ardenti, crudi inverni,
Toleranza, mansuetudine
52Fa de l'aseno l'onor;
Ma 'l ghe mete anca davanti
Ch'el ga 'l primo tra i galanti,
Nè 'l ghe tase che sinonimo
56L'è anca spesso de dotor.
El gobeto Sabatai,
Baratin de quei mercai,
Dise: — «basta, ò inteso, e giudico
60Ch'el cavalo ga rason. —
— Oe, compare, dove seu?
Cossa diavolo diseu?
(Ciga alora el gobo Semola
64Moliner de profession):
«E pur geri sentà storto!
Vu fe a l'aseno sto torto?
Per un solo dei so meriti
68Tanto celebre lo fe? —
— Mi per mi, ghe dago el primo. —
Bravi fioi! per Dio, ve stimo!
(Dise 'l terzo in ton ironico)
72«E del manzo no parlè?
Vedeu là quela boaria?
Savè tuti che l'è mia.
Sapiè mo che la bon'anima
76De mia mare è nata là.
Più de mi no ghe xe al mondo
Chi conossa un manzo a fondo,
Lo dichiaro el più benefico
80Per l'umana società! —
— Ma qui, amici, a quel ch'io sento,
(Dise 'l nobile giumento)
L'interesse e 'l vostro codice
84Move il senso di ciascun. —
— Oh che caro Brigliadoro,
(Ghe risponde i gobi a coro)
Cascheu forsi da le nuvole?
88L'è la regola comun.