I va in Merica

by Berto Barbarani

3 I va in Merica I due canzonieri I due canzonieri/Libro II - I pitochi San Martin I due canzonieri/Libro III - Le montebaldine Berto Barbarani 1896 XIX Soneti veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro II - I pitochi

I va in Merica

1896

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  San Martin

Edission e fonte ▼

Libro III - Le montebaldine  →

I VA IN MERICA.

I.

     Fulminadi da un fraco de tempesta,
l'erba dei prè par 'na metà passìa,¹
brusà le vigne da la malatia
che no lassa i vilani mai de pèsta;

     ipotecado tuto quel che resta,
col formento che val 'na carestia,
ogni paese el g'à la so angonia
e le fameie un pelagroso a testa!

     Crepà la vaca che dasea el formaio,
morta la dona a partorir 'na fiola,
protestà le cambiale dal notaio,

     una festa, seradi a l'ostaria,
co un gran pugno batù sora la tola:
«Porca Italia» i bastiema: «andemo via!»

II.

     E i se conta in fra tuti. – In quanti sio?²
― Apena diese, che pol far strapasso;
el resto done co i putini in brasso,
el resto, veci e puteleti a drio.

     Ma a star quà, no se magna no, par dio,
bisognarà pur farlo sto gran passo;
se l'inverno el ne capita col giasso,
pori nualtri, el ghe ne fa un desìo!³

     – Drento l’Otobre, carghi de fagoti,
dopo aver dito mal de tuti i siori,
dopo aver fusilà⁴ tri quatro goti;⁵

     co la testa sbarlota,⁶ imbriagada,
i se dà du struconi⁷ in tra de lori,
e tontonando i ciapa su la strada!

---

Note

1. passìa: appassita.
2. in quanti sio: in quanti siete
3. el ghe ne fa un desio: ne fa una strage
4. fusilà: nel sonso di chi consuma in fretta e senza una ragione
5. goti: bicchieri
6. testa sbarlota: testa ammattita
7. struconi: abbracci grossolani.