Il Medico
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Un Signor opulente,
Che de saver chi 'l sia no importa gnente,
Dise un zorno al so medico: Sentì,
Dotor mio caro, quel che trovo in mi,
5E che no so spiegar:
Mi no son uso de desordenar,
Son ben costruto e san,
Co magno mi divoro come un can;
Mi no servo al capricio nè a l'usanza,
10E magno roba che pol dar sostanza,
Epur per mia vergogna
Ogni zorno devento più carogna. —
— La m'à fato l'onor
(Risponde sior dotor)
15De invidarme più volte al so disnar,
E mi no l'ò mai vista a mastegar,
Onde con l'opinion de boni autori...
Ma lu interompe, come fa i signori,
Disendo gentilmente,
20No, no xe vero gnente,
Ma s'anca fusse, ò sempre sentio a dir,
Caro Dotor, ch'el cibo à da nutrir. —
— E chi no l'à da dir?
Cazza! i putei lo sa;
25Ma col vien preparà,
Triturà, masenà,
Dal che ghe ne vien drio
Che essendo facilmente digerìo
In sugo e in sangue passa;
30E questo è 'l caso che chi magna ingrassa;
Ma imbocà e divorà,
Come Vostra Celenza à sempre usà,
No per Dio Baco che nol fa bon pro,
Ch'el se corompe in corpo, e 'l passa zo.
35Vu altri che lezè
Tanti gran libri, o sia che li passè,
Vorave, se podessi,
Che sta istoriela a mente ve imparessi.