In memoria de Galina e Favreto
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← L'ombrela a... | Edission e fonte ▼ | El Taramoto → |
Se mi fosse un Plutarco voria farve
'Na biografia fra i omeni imortai;
Se un Rafaelo fusse, ritratarve
Sora 'na tela tuti do tacai;
Ma za che un magro poetazzo son
No ve posso cantar che sta canzon.
El scarpelo e la pena coi penei
Xe sempre andai d'acordo fra de lori,
Tanto che dir se podaria fradei
I scultori e i poeti coi pitori,
E vèdarlo ben pol quei che ama l'Arte
Sui marmi, su le tele e su le carte.
La storia, fra i più grandi e megio fioi
Che sta gran Mare, degna dei romani,
A l'Italia gà da fra artisti e eroi:
Sarpi, Goldoni, Dandolo, Pisani,
Bembo, Gozi, Manin e Tintoreto,
Anca Galina metarà e Favreto.
Col penelo uno, e st'altro co la pena
Gavè i costumi veneziani impressi
Cussì ben su la tela e su la sena
Che gavè vinto i originai stessi,
I veri originai che tuto el zorno
Se incontra andando per Venezia intorno.
Ti po ti xe, mio povaro Giacinto,
Ben degno de Goldoni çitadin,
Che se no ti lo gà del tuto vinto,
Indrio no ti ghe resti, anzi viçin
De lu ti cori, ma co tanta briva
Che vèdar no se pol chi primo ariva.
E indove mai trovar se podaria
Comedie come queste: Serenissima,
Fora del Mondo, I oci del cuor, Mia fia,
E quela più che bela, arçibelissima,
Le barufe in famegia, e La Famegia
In rovina, che xe 'na maravegia?
E l'Amor in paruca? E de la Nona
El moroso? che gera, xe e sarà
El più bel fior de quela gran corona
Che a Venezia e a l'Italia ti gà dà?
E quel'altra che prima de morir
Ti gà scrito pensando a l'avenir?
Quela Base de tuto, che de tute
Forsi la base xe, (secondo mi),
E po' ti xe andà là in mezo a le mute
Tombe de San Micel, viçin a chi
Se in vita e in arte te xe stà fradelo,
In morte e in gloria te sarà zemelo.
Viçin a lu, che in mezo a rose e viole
Gò visto in-t'un brutissimo momento...
Ah, la me lengua no gà più parole
Per dirve quelo che in-t'el cuor me sento!
Che vèdarlo me par ancora adesso,
Tanto el me xe restà in-t'el cuor impresso...
Me ricordo, (seben fusse putelo),
Che gera l'ano de l'Esposizion:
So' stà al so funeral, gò visto el velo
Nero sui so bei quadri: sul Liston,
E sul Tragheto de la Madalena,
Che el fava a tuti maravegia e pena!
«Ah, co bei quadri!» (diseva la zente),
E ti xe morto, povaro Favreto!
Cussì zovene e bon, cussì valente...»
E via i scampava, perchè drento el peto
Ghe fava el cuor tich-tach dal gran dolor:
Ah, co bei quadri! Co divin pitor!
Tante volte de festa vado a Brera,
Vado apositamente per vardar
Quel quadro: El sorcio. Co seneta vera!
E de esser a Venezia mi me par;
De conosser me par quele putele,
Tanto vere le xe, e po tanto bele!
Ma cossa serve ste opere a spiegarle
Se vèdarle pol tuti a so piacer
In casa sua, in Teatro, e po' gustarle
A l'Academia, e ancora dal Librer?
Za i Veneziani le conosse, e lori
I ghe vol ben ai so do bravi autori.
Fin che Venezia col so bel dialeto
E i so costumi piasa ai forestieri,
Galina ognun ricordarà e Favreto
Fra i più grandi d'Italia artisti veri;
Ai quai la Storia zonterà più tardi
Selvatico, Sugana, Nono e Ciardi.
Milan, zenaro 1901